جسٹس سرفراز ڈوگر سمیت 4ہائیکورٹس کے چیف جسٹسز نے حلف اٹھالیا
اسلام آباد(سٹاف رپورٹر،اپنے نامہ نگارسے )جسٹس سردار سرفراز ڈوگر سمیت 4ہائیکورٹس کے چیف جسٹسز نے حلف اٹھا لیا۔ چیف جسٹس اسلام آباد ہائیکورٹ سرفراز ڈوگر کی حلف برداری ایوان صدر میں ہوئی، صدر مملکت آصف علی زرداری نے حلف لیا۔
حلف برداری تقریب میں وفاقی وزیر قانون اعظم نذیر تارڑ، وزیر داخلہ محسن نقوی، چیئرمین سینیٹ یوسف رضا گیلانی، وزیراعلیٰ پنجاب مریم نواز اور سینئر وکلا کی بڑی تعداد شریک ہوئی۔حلف برداری کے بعد اسلام آباد ہائیکورٹ پہنچنے پر وفاقی پولیس کے دستے نے چیف جسٹس سردار سرفراز ڈوگر کو گارڈ آف آنر پیش کیا۔ دریں اثنا سندھ ، پشاور اور بلوچستان ہائیکورٹس کے چیف جسٹس صاحبان نے بھی اپنے اپنے عہدوں کا حلف اٹھایا۔گورنر سندھ کامران ٹیسوری نے چیف جسٹس سندھ ہائیکورٹ جسٹس محمد جنید غفار سے حلف لیا ،تقریب حلف برداری پہلی بار اس جگہ ہوئی جہاں بانی پاکستان قائد اعظم محمد علی جناح نے پہلے گورنر جنرل کے عہدہ کا حلف لیا تھا۔تقریب حلف برداری میں وزیر اعلیٰ سندھ سید مراد علی شاہ ، ایڈووکیٹ جنرل سندھ جواد ڈیرو، جاپان،متحدہ عرب امارات،سعودی عرب، اومان،بنگلہ دیش کے قونصل جنرلز، سندھ ہائیکورٹ کے جسٹس عمر سیال، جسٹس ارشد حسین، جسٹس آغا فیصل ، جسٹس ذولفقار سانگی، جسٹس مبین لاکھو اور دیگر ججز ، انسپکٹر جنرل (آئی جی)سندھ پولیس غلام نبی میمن بھی موجود تھے ۔حلف برداری کے بعد چیف جسٹس سندھ ہائیکورٹ نے مزار قائد پر حاضری دی، فاتحہ خوانی کی اور پھولوں کی چادر چڑھائی۔ادھر گورنر خیبرپختونخوا فیصل کریم کنڈی نے چیف جسٹس پشاور ہائیکورٹ ایس ایم عتیق شاہ سے حلف لیا،حلف برداری کی تقریب میں وزیر اعلٰی خیبرپختونخوا علی امین خان گنڈاپور بھی شریک ہوئے ،تقریب میں ججز ، وفاقی وزیر سیفران امیر مقام اور وکلا بھی موجود تھے ۔علاوہ ازیں گورنربلوچستان شیخ جعفر خان مندوخیل نے چیف جسٹس بلوچستان ہائیکورٹ جسٹس روزی خان سے عہدے کا حلف لیا۔چیف جسٹس کی تقریب حلف برداری میں وزیراعلیٰ بلوچستان سرفراز بگٹی بھی شریک تھے ۔یاد رہے کہ یکم جولائی کو چیف جسٹس پاکستان جسٹس یحیی آفریدی کی زیر صدارت جوڈیشل کمیشن کے اجلاس میں چاروں چیف جسٹسز کی تعیناتی کی منظوری دی گئی تھی۔
