گنڈاپور بتائیں کس کے این او سی پر وزیراعلیٰ بنے ؟ حمداللہ
اسلام آباد(اپنے رپورٹر سے،مانیٹرنگ ڈیسک، دنیا نیوز)جمعیت علمائے اسلام کے رہنما حافظ حمد اللہ نے کہا ہے کہ مولانا فضل الرحمن کو فارم 47 کا بینیفشری کہنے والے گنڈاپور بتائیں وہ کس کے این او سی پر خیبر پختونخوا کے وزیراعلیٰ بنے؟ علی امین گنڈاپور خود تین میں ہیں نہ تیرہ میں۔
گنڈاپور کے سربراہ جے یو آئی مولانا فضل الرحمٰن سے متعلق بیان پر حافظ حمد اللہ نے اپنے ردعمل میں کہا کہ پورا صوبہ خیبرپختونخوا جل رہا ہے ، وہاں کے عوام امن کے لیے ترس رہے ہیں، لیکن وزیراعلیٰ لاؤ لشکر سمیت پنجاب فتح کرنے نکلے ہیں اور لاہور میں بڑھکیں مار رہے ہیں۔ان کی حکومت دولت اور طاقت کے بل پر کھڑی ہے ،8 فروری کے انتخابات میں علی امین کو ووٹ سے نہیں بلکہ نوٹ سے جتوایا گیا۔حافظ حمد اللہ نے کہا پی ٹی آئی کے اندر سے بھی خیبرپختونخوا کی حکومت کے خلاف آوازیں اٹھ رہی ہیں، آئے روز خیبرپختونخوا کے عوام اپنے پیاروں کی لاشیں اٹھا رہے ہیں۔ ان کا کہنا ہے کہ علی امین خود فارم 47 کے وزیر اعلیٰ ہیں جو چند مہینوں کے مہمان ہیں، وزیر اعلیٰ باجوڑ جانے کے بجائے لاہور میں سیر سپاٹے کر رہے ہیں جو انتہائی شرمناک ہے، وزیر اعلیٰ اپنے سابق وزیر اطلاعات شوکت یوسفزئی کے اعتراف کے مطابق جعلی مینڈیٹ پر براجمان ہیں۔صوبائی حکومت سر تا پاؤں کرپشن میں ڈوبی ہے، صوبائی خزانے پر لاہور کا ٹور کرنے والوں سے پائی پائی کا حساب لیا جائے گا۔ ترجمان کے مطابق مولانا فضل الرحمٰن کے حقیقت پر مبنی بیان نے وزیر اعلیٰ کی ڈرامہ بازی پر پانی پھیر دیا۔
