الیکشن کمیشن:پختو نخوا میں مخصوص نشستوں کی تقسیم کا فیصلہ محفوظ
اسلام آباد (وقائع نگار))پختو نخوا اسمبلی کی مخصوص نشستوں پر ارکان کی بحالی کے معاملے کی الیکشن کمیشن میں سماعت ہوئی، چیف الیکشن کمشنر کی سربراہی میں 5 رکنی بینچ نے سماعت کی۔
ن لیگ، پیپلز پارٹی، جے یو آئی، اے این پی سمیت دیگر سیاسی جماعتوں کے وکلا پیش ہوئے اور دلائل دیئے ۔پیپلزپارٹی کے وکیل نیئر بخاری نے دلائل دیتے ہوئے موقف اپنایا کہ مخصوص نشستوں کی تقسیم کا معاملہ جے یو آئی اور ن لیگ کے درمیان ہے ، ن لیگ کا دعویٰ ہمارے خلاف نہیں۔ عوامی نیشنل پارٹی کے وکیل نے دلائل میں کہا کہ ضمنی انتخاب میں ہم ایک سیٹ جیتے ہیں، ہمارا یہ موقف ہے کہ جب انتخابات ہوئے اس کے بعد کی صورتحال کے مطابق سیٹیں دی جانی چاہئیں۔چیف الیکشن کمشنر نے کہا کہ مخصوص نشستوں سے متعلق دو فیز میں نوٹیفکیشنز ہوئے ، پہلے تو سنی اتحاد کونسل والا معاملہ حل نہیں ہوا تھا۔ تحریک انصاف پارلیمنٹیرینز کے وکیل نے دلائل میں مو قف اپنایا کہ جنرل نشستوں کے بعد ہی مخصوص نشستیں ملنی ہیں، جتنی جنرل نشستیں ہونگی اتنی ہی مخصوص نشستیں ملنی چاہئیں، سب سے اہم مسئلہ کٹ آف تاریخ کا ہے ۔ممبر سندھ نثار درانی نے کہا کہ اگر ضمنی انتخابات میں کسی جماعت کی سیٹیں کم ہوجائیں تو کیا مخصوص نشستیں کم ہوسکتی ہیں؟ وکیل پی ٹی آئی نے کہا کہ نہیں، مخصوص نشستیں واپس نہیں لی جاسکتیں، ہمارے تحفظات ہیں کہ ہمارے دو نمائندوں کو ایک شمار کیا گیا ہے ، نوٹیفکیشنز کے مطابق اگر دیکھا جائے تو ہماری دو مخصوص نشستیں بنتی ہیں۔فریقین کے دلائل سننے کے بعد الیکشن کمیشن آف پاکستان نے مخصوص نشستوں کی تقسیم کیس کا فیصلہ محفوظ کر لیا۔
