خواتین کلاء کیلئے الگ بار روم بنانے کے منصوبہ پر عملدر آمد شروع
لاہور (محمد اشفاق سے )پنجاب کی خواتین وکلاء کیلئے بڑی خوشخبری ، تاریخ میں پہلی مرتبہ چیف جسٹس لاہور ہائیکورٹ جسٹس مس عالیہ نیلم کی منظوری کے بعد پنجاب کے تمام اضلاع اور تحصیل کی سطح پر اسٹیٹ آف دی آرٹ الگ بار ایسویشی ایشنز بنانے کے منصوبہ پر عملدرآمد شروع ، اٹک بار کی تحصیل جنڈ میں خواتین وکلاء کیلئے تاریخ کا پہلا الگ اسٹیٹ آف دی آرٹ لیڈیز بار روم کا پراجیکٹ مکمل ہوگیا۔
خواتین وکلاء نے چیف جسٹس عالیہ نیلم کو زبردست خراج تحسین پیش کیا۔تفصیلات کے مطابق پنجاب کے مختلف اضلاع اور تحصیل بار ایسوسی ایشنز میں خواتین کیلئے الگ لیڈیز بار رومز کا قیام نہ ہونے سے خواتین وکلاء کو شدید مشکلات کا سامنا رہتا ہے اور اس حوالے سے خواتین وکلاء کے وفد نے چیف جسٹس لاہور ہائیکورٹ جسٹس مس عالیہ نیلم سے ملاقات کرکے انہیں اپنے مسائل سے آگاہ کیا ،جس پر چیف جسٹس مس عالیہ نیلم نے فوری ایکشن لیتے ہوئے تاریخ میں پہلی مرتبہ پنجاب کے اضلاع اور تحصیلوں میں خواتین وکلاء کیلئے الگ98 اسٹیٹ آف دی آرٹ لیڈیز بار رومز بنانے کی منظوری دی، چیف جسٹس کے حکم پر پائلٹ پراجیکٹ کے طور پر منصوبہ کا آغاز تحصیل بار ایسوسی ایشنز سے کیا گیا اور پہلے مرحلے میں ضلع اٹک کی تحصیل بار ایسوسی ایشن جنڈ میں خواتین وکلاء کیلئے الگ بار روم کا منصوبہ مکمل کیا گیا جہاں چیف جسٹس کے حکم پر خواتین وکلاء کو تمام سہولیات فراہم کی گئی ہیں، بار روم میں معیاری فرنیچر ، الگ کچن کے ساتھ ڈے کئیر سنٹر اور بچوں کیلئے پلے لینڈ ایریا بھی بنایا گیا ہے ، دیگر اضلاع اور تحصیل بار ایسوسی ایشنز میں الگ لیڈیز بار رومز کی تعمیر کا کام جاری ہے ، اس سے قبل خواتین وکلاء کو مشترکہ بار رومز میں بیٹھ کر فرائض ادا کرنے پڑتے تھے ۔جنڈ تحصیل بار کی صدر نگہت شمیم کا کہنا ہے کہ چیف جسٹس مس عالیہ نیلم نے خواتین وکلاء کا دیرینہ مطالبہ پورا کردیا ،انتہائی کم وقت میں چیف جسٹس کے حکم پرنئی بلڈنگ تعمیر کی گئی جہاں ہر قسم کی سہولت میسر ہے ۔وائس چیئرمین پنجاب بار کونسل عرفان صادق تارڑ کا کہنا ہے کہ چیف جسٹس مس عالیہ نیلم مرد وکلاء اور خواتین وکلاء کے مسائل ترجیحی بنیادوں پر حل کررہی ہیں ،ہم انہیں خراج تحسین پیش کرتے ہیں۔
