مفتاح کو پاکستان کی ترقی ہضم نہیں ہو رہی : عطا تارڑ
اسلام آباد(اے پی پی)وفاقی وزیر اطلاعات و نشریات عطا اﷲ تارڑ نے کہا ہے کرپٹو کرنسی کی ریگولیشن کے حوالے سے نظام وضع کیا گیا ہے اس بارے میں مفتاح اسماعیل کا بیانیہ زمینی حقائق کے برعکس ہے۔
کرپٹو کرنسی بڑھتا ہوا شعبہ ہے اس کے متعلق بغیر تحقیق کے بات کرنا، کسی پر بلا وجہ الزام لگانا دشمن کا ایجنڈا ہے، پاکستان کا نہیں۔ پاکستان کی معیشت ترقی کر رہی ہے تو شاید مفتاح کو ہضم نہیں ہو رہی۔پیر کو میڈیا سے گفتگو کرتے ہوئے وفاقی وزیر اطلاعات نے کہا ڈاکٹر عافیہ صدیقی سے متعلق نائب وزیراعظم و وزیر خارجہ اسحاق ڈار کے بیان کو سیاق و سباق سے ہٹ کر پیش کیا گیا ڈاکٹر عافیہ صدیقی کے معاملے میں حکومت سفارتی و قانونی مدد فراہم کر رہی ہے ، اس معاملے پر پیشرفت کے لئے وزیر قانون کی سربراہی میں کمیٹی بھی بنائی گئی ہے ۔ انہوں نے کہا نائب وزیراعظم و وزیر خارجہ اسحاق ڈار کے حوالے سے غلط خبر دی گئی کہ وہ شوگر ایڈوائزری بورڈ کے رکن ہیں اس طرح کی خبر دینے سے پہلے ریکارڈ چیک کرلینا چاہئے ، سینیٹ کے اندر ایک سوال کیا گیا جس کا جواب محکمہ نے تحریری طور پر جمع کروایا جو بھی معاملات ہیں وہ تحریری طور پر فلور آف دی ہاؤس پر موجود ہیں۔ انہوں نے کہا کرپٹو کی پاکستان کے اندر گروتھ ہے ، ماضی میں ہم نے دیکھا ہے ہمارے دشمن نے کرپٹو سے متعلق اقدامات پر سوالات اٹھائے ، مفتاح اسماعیل کا بھی وہی بیانیہ ہے جو انڈیا کا کرپٹو کے بارے میں ہے ۔ ایک سوال کے جواب میں عطا اﷲ تارڑ نے کہا ڈاکٹر عافیہ صدیقی کی رہائی کے لئے جتنی کوششیں اس دور میں کی جا رہی ہیں شاید ہی کبھی کسی دور میں ہوئی ہوں، اسحاق ڈار نے بھی وضاحت کر دی ہے ان کے بیان کو سیاق و سباق سے ہٹ کر پیش کیا گیا یہ مخالفین کی سازش تھی۔
