سرکاری حج سکیم : پہلے آئو پہلے پائو کی بنیاد پر آج سے درخواستوں کی وصولی
اسلام آباد(اپنے رپورٹر سے)سرکاری حج سکیم کے تحت پہلے آؤ پہلے پاؤ کی بنیاد پر آج سے حج درخواستیں وصول کی جائیں گی، آئندہ سال سرکاری سکیم کاکوٹہ 70فیصد کے تناسب سے ایک لاکھ 19 ہزار 210 مختص کیا گیا ہے ، پرائیویٹ حج سکیم کے لیے 60 ہزار کوٹہ مختص ہے۔
رجسٹرڈ افراد سرکاری سکیم کے تحت اپنی درخواست 4 سے 9 اگست تک جمع کرواسکتے ہیں ، غیر رجسٹرڈ افراد سے درخواستوں کی وصولی 11 اگست سے 16 اگست تک ہوگی۔ درخواستیں پوری ہونے پر پورٹل مزید درخواستیں وصول نہیں کرے گا۔ آئندہ سال سرکاری سکیم کے تحت دواقساط میں واجبات جمع کرانے کی سہولت دی گئی ہے ، سرکاری حج سکیم کیلئے مختصر پیکیج بھی دیا جائے گا ۔ سرکاری حج کا تخمینہ ساڑھے گیارہ سے ساڑھے بارہ لاکھ روپے ہے ، حج اخراجات کی پہلی قسط اگست کے پہلے ہفتے سے جمع ہو گی ، لانگ پیکیج کیلئے پہلی قسط پانچ لاکھ اور کم دورانیہ کیلئے پہلی قسط ساڑھے پانچ لاکھ روپے ہوگی ۔ لانگ پیکیج 38سے 42جبکہ شارٹ پیکیج 20سے 25روزکا ہوگا ۔ بیرون ملک مقیم پاکستانی وزارت حج کے نامزد بینکوں میں رقم بھجوا سکتے ہیں۔روڈ ٹو مکہ حج کی سہولت اسلام آباد اور کراچی ایئرپورٹس پر میسر ہوگی ، عازمین کو حج سے متعلق مکمل تربیت دی جائے گی ، حج کیلئے ایمرجنسی رسپانس ٹیمیں تشکیل دی جائیں گی ، مالیاتی نگرانی کا موثر نظام لاگو کیا جائے گا ۔ حج ناظم سکیم جاری رکھی جائے گی ، شکایات ازالہ کیلئے شفاف نظام رائج کیا جائے۔
