پاک چین کا مضبوط اقتصادی تعاون ترقی کی کنجی ، احسن اقبال
اسلام آباد(خصوصی رپورٹر)وفاقی وزیر منصوبہ بندی، ترقی اور خصوصی اقدامات پروفیسر احسن اقبال نے کہا ہے کہ سی پیک نے چین اور پاکستان کی لازوال دوستی کو سیاسی تعاون سے بڑھا کر معاشی و سماجی شراکت داری میں بدل دیا۔۔۔
پاکستان اور چین کا مضبوط اقتصادی تعاون قومی ترقی کی کنجی ہے ،دیرپا اور پائیدار اقتصادی ترقی کے لئے چین کی سائینٹفک پلاننگ مشعل راہ ہے ،ان خیالات کا اظہار انہوں نے چین کے ڈویلپمنٹ ریسرچ سنٹر (ڈی آرسی) اور سینٹر فار انٹرنیشنل نالج آن ڈیویلپمنٹ ( سی آئی کے ڈی )کے صدر لو ہاوسے ملاقات کے دوران کیا۔احسن اقبال نے کہا کہ پاکستان چین کی اقتصادی اور اصلاحاتی کامیابیوں سے سیکھنے کا خواہاں ہے ۔ انہوں نے کہا کہ اڑان پاکستان پروگرام سے ملکی معیشت استحکام کی راہ پر گامزن ہو رہی ہے ،اڑان پاکستان کا ہدف پاکستان کو 2035 تک ایک ٹریلین ڈالر معیشت بنانے کا ہے ۔ احسن اقبال نے مزید کہا کہ پاکستانی معیشت کے تمام اشاریوں کے مثبت ہونے کی عالمی ادارے تصدیق کر رہے ہیں،پالیسی ریٹ 23 فیصد سے کم ہو کر 11 فیصد پر آ چکا ہے اور پاکستان اسٹاک ایکسچینج ایک لاکھ 40 ہزار پوائنٹس سے تجاوز کر چکی ہے ۔ احسن اقبال نے کہا کہ پاکستان چین کے ساتھ تجارت اور برآمدات کو فروغ دینا چاہتا ہے ،چینی منڈیوں تک رسائی حاصل کرنا اہم معاشی ہدف ہے ۔ اس موقع پر گفتگو کرتے ہوئے لو ہاو نے پاکستان کی برآمدات پر مبنی معیشت بننے کی حکمت عملی پر اعتماد کا اظہار کیا۔ انہوں نے وزارت منصوبہ بندی پاکستان اور چین کے ڈیولپمنٹ ریسرچ سینٹر کے درمیان اشتراک اور تعاون کے معاہدے پر اتفاق رائے کرتے ہوئے کہا کہ مشترکہ تحقیق، تربیتی پروگرامز اور ماہرین کے تبادلوں کے ذریعے چین پاکستان کی معاشی میدان میں مدد کرے گا۔
