پاکستان اور افغانستان بات چیت کا راستہ اپنائیں:چین
چین دونوں ملکوں کے بہتر تعلقات کیلئے تعمیری کردار ادا کرنے کو تیار:ترجمان
اسلام آباد(ویب ڈیسک )پاکستان اور افغانستان کے درمیان کشیدگی اور باہمی تنازعات پر پہلی بار ہمسایہ ملک چین نے ردعمل دیا ہے ۔ عالمی خبر رساں ادارے کے مطابق چین کی وزارت خارجہ کے ترجمان نے زور دیا کہ پاکستان اور افغانستان کشیدگی کم کرنے کیلئے بات چیت کا راستہ اپنائیں۔ باہمی اختلافات اور تنازعات سفارتی سطح پر بات چیت سے فوری حل کریں۔ ترجمان گو جیاکن نے کہا پاکستان اور افغانستان دونوں چین کے روایتی اور دوستانہ پڑوسی ممالک ہیں اور ہمیشہ ایک دوسرے کے پڑوسی رہیں گے ، چین کی خواہش ہے دونوں ممالک اختلافات اور تنازعات بات چیت اور مشاورت کے ذریعے حل کریں، کشیدگی کم کریں اور مل کر خطے کو پُرامن اور مستحکم رکھیں۔ چینی ترجمان نے پیشکش کی کہ ہم بین الاقوامی برادری کے ساتھ کام کرنے اور پاکستان اور افغانستان کے تعلقات میں بہتری لانے کیلئے تعمیری کردار ادا کرنے کیلئے تیار ہیں۔ یہ مؤقف خطے میں امن کیلئے چین کی روایتی سفارتی پالیسی کے مطابق ہے جو دوستی، تعاون اور مشترکہ مفاد پر مبنی تعلقات کو فروغ دینے پر مرکوز ہے ۔
