فیض حمید کو ان کے جرائم کی حقیقی سزا نہیں ملی : ایمل ولی
چائے کا کپ پکڑ کر کابل میں 40 ہزار دہشتگردوں کو منظم کرنیوالا آج بھی بے حساب جب تک پورے گٹھ جوڑ کا احتساب نہیں ہوتا، امن و انصاف ناممکن :صدر اے این پی
پشاور(مانیٹرنگ ڈیسک)صدر عوامی نیشنل پارٹی ایمل ولی خان نے لیفٹیننٹ جنرل(ر)فیض حمید کی سزا پر ردعمل دیتے ہوئے کہا ہے کہ فیض حمید کو ان کے جرائم کی حقیقی سزا نہیں ملی، چائے کا کپ پکڑ کر کابل میں 40 ہزار دہشتگردوں کو منظم کرنے والا آج بھی بے حساب ہے۔ ایمل ولی خان کاکہناتھا کہ پختونوں کی دوبارہ نسل کشی کی کوشش پر بھی فیض سے بازپرس نہیں ہوئی،فیض،باجوہ اورعمران گٹھ جوڑ کے سارے فیضیاب آج بھی اقتدار کے مزے لوٹ رہے ہیں، پوری ایک نسل کو اپنے سیاسی مشران کا دشمن بنایا گیا ،قوم کو بتایا گیا کہ آپ کے سارے مشران چور ہیں اور صرف ایک مسیحا ہے ۔ صدر اے این پی کا کہناتھا کہ وفاق اور پنجاب نے تبدیلی چار سال انجوائے کی، نقصان سب سے زیادہ پختونوں نے اٹھایا، پختونخوا میں اسٹیبلشمنٹ کی تیسری بار کی گئی انجینئرنگ نے صوبہ تباہ کیا،ان کا کہنا تھا کہ جب تک پورے گٹھ جوڑ کا احتساب نہیں ہوتا، امن اور انصاف ممکن نہیں،پختونوں کے خلاف سازشیں بے نقاب کیے بغیر حالات درست نہیں ہوں گے ۔
