موبائل ورچوئل نیٹ ورک آپریٹرز کیلئے پالیسی فریم ورک کانفاذ
ایم وی این او کا لائسنس ابتدائی طور پر 15 سال کیلئے جاری کیا جائیگا، پی ٹی اے
اسلام آباد (نیوز رپورٹر) پاکستان ٹیلی کمیونیکیشن اتھارٹی (پی ٹی اے ) نے وفاقی کابینہ کی منظوری کے بعد موبائل ورچوئل نیٹ ورک آپریٹرز (ایم وی این او) کے لیے پالیسی فریم ورک نفاذ کر دیا ہے ، پالیسی فریم ورک کے تحت ایم وی این اوز سپیکٹرم رکھے بغیر، لائسنس یافتہ موبائل نیٹ ورک آپریٹرز کے ساتھ معاہدوں کے ذریعے اپنی الگ برانڈ شناخت کے تحت ملک بھر میں جدید موبائل خدمات فراہم کر سکیں گے جبکہ ایم وی این او کا لائسنس ابتدائی طور پر 15 سال کے لیے جاری کیا جائے گا جو متعلقہ ریگولیٹری شرائط کی تکمیل سے مشروط ہوگا،پالیسی فریم ورک کی تیاری جدید اور دور حاضر سے ہم آہنگ موبائل سروسز کے فروغ کے پیش نظر عمل میں لائی گئی تاکہ سروس کے معیار کو بہتر بنانے کے ساتھ ساتھ صارفین کو سستی اور مختلف نوعیت کی موبائل سہولیات فراہم کی جا سکیں۔ اس اقدام سے سرمایہ کاری کے نئے مواقع پیدا ہوں گے ، روزگار میں اضافہ ہوگا ،پی ٹی اے جلد پاکستان میں ایم وی این اوز کے لیے لائسنس کے اجراء کے عمل کا آغاز کرے گا۔
