ٹیکس وصولی ، وفاق کی کارکردگی صوبوں سے بہتر،مشیر وزیر خزانہ
اندازہ ہے جون تک ٹیکس وصولیاں جی ڈی پی کے 15فیصد تک پہنچ جائیں گی
اسلام آباد (اے پی پی)وزیرخزانہ کے مشیرخرم شہزادنے کہاہے ٹیکس وصولی کے حوالہ سے وفاق کی کارکردگی صوبوں سے بہترہے ، وسائل کی تقسیم اور مالیاتی وفاقیت پر بحث اثر یا دعوؤں کے بجائے ناپے گئے نتائج اور کارکردگی کی بنیاد پر ہونی چاہیے ،وفاقی ٹیکس وصولیاں بتدریج بڑھ رہی ہیں اور اندازہ ہے کہ جون 2028 تک یہ جی ڈی پی کے 15 فیصد تک پہنچ جائیں گی۔ جمعہ کوسماجی رابطہ کی ویب سائیٹ ایکس پر اپنے ایک بیان میں انہوں نے کہا ملک میں حالیہ دنوں یہ دعویٰ سامنے آ رہا ہے کہ ٹیکس وصولی کے حوالہ سے صوبائی حکومتوں کی کارکردگی وفاقی حکومت سے بہتر ہے اور اسی بنیاد پر یہ موقف اختیار کیا جا رہا ہے کہ وسائل کی تقسیم پر مزید بحث کی ضرورت نہیں تاہم دستیاب سرکاری اعداد و شمار اور معاشی حقائق اس دعوے کی تردید کرتے ہیں اور ایک بالکل مختلف تصویر پیش کرتے ہیں۔انہوں نے کہاکہ مالی سال 2025 کے دوران وفاقی حکومت نے 13 ٹریلین روپے سے زائد ٹیکس اور دیگر محصولات جمع کئے جو پاکستان کی مجموعی قومی پیداوار (جی ڈی پی) 114.7 ٹریلین روپے کے مقابلے میں 11.3 فیصد بنتی ہے ۔اس کے مقابلے میں تمام صوبوں نے مجموعی طور پر صرف 979 ارب روپے ٹیکس جمع کیا جو مجموعی قومی پیداوار کا محض 0.85 فیصد بنتاہے جبکہ متوقع معیار کے مطابق صوبوں کو کم از کم 3 فیصد جی ڈی پی کے برابر ٹیکس وصول کرنا چاہیے ۔
