یونس کا مستقبل میں بھی بورڈ سے منسلک رہنے کا امکان
کس رول میں خدمات انجام دینگے تفصیلات طے ہونے لگیں،ذرائع
لاہور(سپورٹس ڈیسک)یونس خان کا مستقبل میں بھی پاکستان کرکٹ بورڈ کے ساتھ منسلک رہنے کا امکان ہے ۔ذرائع کا کہنا ہے کہ پی سی بی میں سابق کپتان یونس خان کو مستقبل میں بھی سسٹم کا حصہ برقرار رکھنے پر اتفاق ہوا ہے ۔ذرائع کے مطابق یونس خان کی خدمات سے مستقبل میں بھی استفادہ کیا جائے گا۔سابق کپتان یونس خان کہاں اور کس رول میں خدمات انجام دیں گے اس کی تفصیلات طے کی جارہی ہیں۔ذرائع نے بتایا کہ سابق کپتان یونس خان جلد پی سی بی چیف ایگزیکٹو وسیم خان سے ملاقات کریں گے ۔یہ ملاقات گزشتہ ہفتے شیڈول تھی تاہم وسیم خان کی لاہور میں عدم موجودگی اور مصروفیات کے باعث یہ ملاقات نہ ہوسکی۔ ذرائع کا کہنا تھا کہ آئندہ ہفتے اس ملاقات کا امکان ہے جس کے بعد یونس خان کے رول کو حتمی شکل دی جائے گی۔ذرائع کا کہنا تھا کہ قومی ٹیم کے بیٹنگ کوچ کے علاوہ ایج گروپ ٹیموں کیلئے یونس خان کی خدمات لی جائیں گی۔
