پی سی بی پاکستان سپر لیگ کی اچھی ونڈو نکالنے کیلئے پرامید
لاہور (سپورٹس ڈیسک ) چیئرمین پی سی بی محسن نقوی کا کہنا ہے کہ پاکستان سپر لیگ پاکستان کا ایک برانڈ ہے اس لیے نہ کوئی کوتاہی ہو گی نہ اسے نظر اندز کیا جائے گا۔ پاکستان کرکٹ بورڈ پی ایس ایل کے 10 ویں ایڈیشن کیلئے اچھی ونڈو نکالنے کے لیے پر امید ہے۔۔
اور اس سلسلے میں تمام سٹیک ہولڈرز کے ساتھ جلد مشاورت کی جائے گی۔ چیئرمین پاکستان کرکٹ بورڈ محسن نقوی نے کہا ہے کہ انٹرنیشنل کمٹمنٹس کو پورا کرنے کے ساتھ پی ایس ایل کے 10 ویں ایڈیشن کے لیے ایک اچھی ونڈو نکالیں گے ، پی سی بی کے عہدیدار انٹرنیشنل کمٹمنٹس اور لیگ پر کام کر رہے ہیں، اس سلسلے میں تمام فرنچائزز اور سٹیک ہولڈرز کو اعتماد میں لیں گے ۔ واضح رہے کہ پاکستان سپر لیگ روایتی طور پر جنوری سے مارچ کے درمیان ہوتی ہے لیکن آئندہ برس جنوری، فروری میں سہ فریقی سیریز، فروری مارچ میں چیمپئنز ٹرافی کی میزبانی اور پھر دورہ نیوزی لینڈ کی وجہ سے کرکٹ بورڈ کو پی ایس ایل کی روایتی ونڈو تبدیل کرنے کا چیلنج درپیش ہے ۔
