کپتانی چیلنج ، پاکستان کرکٹ کو اوپر دیکھنا خواہش : محمد رضوان
لاہور(سپورٹس ڈیسک)پاکستان کے وائٹ بال کپتان محمد رضوان کا کہنا ہے کہ پاکستان کے لیے کھیلنا کسی بھی کھلاڑی کے لیے خواب ہوتا ہے ۔۔
یہ بہت بڑا اعزاز ہوتا ہے اور اس سے بھی زیادہ یہ کہ آپ پاکستان ٹیم کی قیادت کریں۔محمد رضوان نے پی سی بی ڈیجیٹل کو دئیے گئے ، انٹرویو میں کہا کہ یہ چیلنج بھی ہے کہ قوم مجھ سے جو توقعات وابستہ کیے ہوئے ہے میں اس ذمہ داری کو ان توقعات کے مطابق نبھاؤں۔ ماضی میں جو بھی کپتان گزرے ہیں، انہوں نے ان سے سیکھا ہے ۔کچھ نرم اور کچھ غصے والے ہیں ، کوشش کروں گا کہ جو کچھ سیکھا ہے اسے اپلائی کروں گا اور اللہ تعالی میرے مدد کریں گے ۔رضوان نے کہا کہ کپتان کی خصوصیت یہ ہے کہ ٹیم کو اکٹھا کیا جائے ۔ جب ٹیم اکٹھی ہوتی ہے تو پوری ٹیم اکٹھی نظر آتی ہے وہ کسی ایک بندے کی وجہ سے نظر نہیں آتی۔ انہوں نے کہا کہ آسٹریلیا میں ہمیشہ ہمیں مشکلات کا سامنا رہا ہے لیکن اگر ہم آسٹریلیا میں آخری ٹیسٹ سیریز دیکھیں تو ہم ہر ٹیسٹ جیتنے کی پوزیشن میں تھے اور قریب جاکر ہارے ہیں اور ہم نے جو چیزیں نوٹ کی ہیں اگر ہم ان پر کام کریں تو ہم آسٹریلیا کو آسٹریلیا میں ہرائیں گے ۔ ہم نے سینئر اور ینگ کھلاڑیوں کے ساتھ ملکر وہاں لڑنا ہے ۔رضوان نے کہا کہ ان کا وژن یہ ہے کہ ان کے پاس بیک اپ میں کپتان تیار رہے ۔نہ صرف کپتان تیار رکھنا ہے بلکہ کیپر بھی تیار رکھنا ہے ۔ میری سب سے بڑی خواہش پاکستان کرکٹ کو اوپر دیکھنا ہے ۔جب ٹیم میں نوجوان کھلاڑی آتے ہیں تو انہیں ایڈجسٹمنٹ میں اور سمجھنے میں وقت لگتا ہے لیکن انہیں لگتا ہے کہ یہ گیپ اب کم ہوگیا ہے اور انہیں امید ہے کہ یہ ٹیم ایک مختلف روپ میں نظر آئے گی۔
