مسلسل شکستوں کے بعد عاقب جاوید کی رخصتی کا پروانہ بھی جاری
لاہور(سپورٹس ڈیسک)پاکستان کرکٹ بورڈ نے مسلسل شکستوں اور قومی ٹیم کی ناقص پرفارمنس کو دیکھتے ہوئے نئے ہیڈ کوچ کی تلاش کیلئے اشتہار دیدیا۔
بورڈ کی جانب سے اقدام ایسے وقت میں سامنے آیا ہے جب عبوری ہیڈکوچ کی ذمہ داریاں سنبھالنے والے عاقب جاوید کی سربراہی میں گرین شرٹس کو مسلسل شکستیں دیکھنا پڑیں۔عاقب جاوید کے دور میں پاکستان ہوم گراؤنڈ پر ہونیوالی چیمپئینز ٹرافی کے پہلے راؤنڈ سے باہر ہوا جبکہ دورہ نیوزی لینڈ میں انہیں بدترین شکست ہوئی، 7 میچز کے ٹور میں قومی ٹیم محض ایک فتح حاصل کرسکی۔قبل ازیں سابق ہیڈکوچ گیری کرسٹن اور جیسن گلیسپی جیسے تجربہ کار کوچز کو بھی گزشتہ سال محض چند ماہ ذمہ داریاں پوری کرکے جبری طور پر رخصت کردئیے گئے تھے ۔ادھر بورڈ کی جانب سے ہیڈکوچ کیلئے جاری کردہ اشتہار میں لیول 3 کوچنگ سرٹیفکیٹ اور 10 سال کا تجربہ مانگا ہے ۔ اطلاعات کے مطابق عبوری ذمہ داریاں سرانجام دینے والے عاقب جاوید اب ہیڈ کوچ بننے میں دلچسپی نہیں رکھتے تاہم ہائی پرفارمنس ڈائریکٹر بننا چاہتے ہیں۔ادھر ہیڈ کوچ کے حوالے سے ذرائع نے بتایا کہ پی سی بی ایک بار پھر غیر ملکی ہیڈ کوچ کی طرف جا سکتا ہے ۔ہیڈ کوچ کے لیے لیول تھری کرکٹ کوچ کی اہلیت درکار ہے ۔ 4 مئی تک ہیڈ کوچ کیلئے درخواستیں طلب کی گئی ہیں۔ذرائع نے بتایا کہ ہیڈ کوچ کیلئے پاکستان کرکٹ بورڈ کے پاس محدود چوائس ہے ، ہیڈ کوچ کیلئے ملکی محدود چوائسزکیلئے پی سی بی ہچکچاہٹ کا شکار ہے جبکہ غیر ملکی کوچ کی طرف پی سی بی کا رجحان زیادہ ہے ۔ذرائع نے یہ بھی بتایا کہ پی سی بی کوچکیلئے بڑے ناموں کی طرف نہیں جائے گا۔
