محمد عباس نے شاندار پرفارمنس پاک فوج کے نام کر دی
ٹرینٹ برج (سپورٹس ڈیسک )پاکستان کے مایہ ناز ٹیسٹ فاسٹ بولر محمد عباس نے کاؤنٹی چیمپئن شپ میں ناٹنگھم شائر کی جانب سے اپنے ڈیبیو میچ کی شاندار کارکردگی پاکستانی فوج کے نام کر دی۔۔
عباس نے اپنے سابقہ کلب ہیمپشائر کے خلاف تباہ کن بولنگ کرتے ہوئے 15 اوورز میں صرف 31 رنز دے کر 5 وکٹیں حاصل کیں اور حریف ٹیم کو پہلی اننگز میں 196 رنز پر ڈھیر کر دیا، ان کی شاندار بولنگ کی بدولت ناٹنگھم شائر کو میچ میں 137 رنز کی نمایاں برتری حاصل ہوئی۔میچ کے بعدنجی ٹی وی سے گفتگوکرتے ہوئے انہوں نے کہاکہ سب سے پہلے میں اللّٰہ تعالیٰ کا شکر ادا کرتا ہوں کہ مجھے ناٹنگھم شائر کے لیے ڈیبیو میچ کی پہلی اننگز میں 5 وکٹیں لینے کا موقع ملا۔ میں اس گراؤنڈ پر پہلے بھی کھیل چکا ہوں، نئی گیند کے ساتھ فاسٹ بولرز کو کچھ مدد ملتی ہے ، میں بہت خوش ہوں کہ میں اپنی ٹیم کے لیے کارآمد ثابت ہوا۔ میں یہ کارکردگی ہماری بہادر پاکستانی افواج ‘آرمی، نیوی اور ایئر فورس’ کے نام کرنا چاہتا ہوں، جو اس وقت بھی ملک کی سرحدوں پر دشمن کے خلاف بڑی بہادری سے ڈٹے ہوئے ہیں۔ ہم پاکستانی دنیا میں امن چاہتے ہیں، خاص طور پر اپنے ہمسایہ ممالک کے ساتھ، لیکن اگر ہمیں بار بار جنگ میں دھکیلا جائے گا تو ہماری افواج نے جس طرح اس بار جواب دیا ہے ، مجھے یقین ہے کہ آئندہ بھی دشمن کی کسی بھی مہم جوئی کا اسی انداز میں جواب دیں گی۔
