دنیاآگے ،پاکستانی ٹیم ماڈرن کرکٹ سے پیچھے :محمدحارث
راولپنڈی (سپورٹس ڈیسک )پشاور زلمی کے وکٹ کیپر بیٹر محمد حارث نے کہاہے کہ پاکستان کی نسبت دنیا ماڈرن ڈے کرکٹ کے حساب سے بہت آگے نکل گئی ہے ۔
نجی ٹی وی سے خصوصی گفتگو کرتے ہوئے انہوں نے کہا کہ بطور بیٹرز اور ٹیم ماڈرن ڈے کرکٹ کے پیشِ نظر پاکستان پیچھے ہے ، لیکن میں ماڈرن ڈے کرکٹ کو مدِ نظر رکھتے ہوئے ہی پریکٹس کرتا ہوں۔ ماڈرن ڈے کرکٹ کو کیسے اپنانا ہے ، اسی پر کوچز سے بات ہوتی رہتی ہے ، میرا ٹارگٹ ہے کہ مستقبل کے ایونٹس میں ماڈرن ڈے کرکٹ کے حساب سے کھیلوں۔ قومی کرکٹ ٹیم بھی اگر ماڈرن ڈے کرکٹ کے حساب سے کھیلے گی تو مشکلات کا سامنا نہیں ہوگا۔ کسی بھی بیٹر کے لیے بیٹنگ نمبر بہت ضروری ہوتا ہے ، لیکن مجھے کسی بھی بیٹنگ پوزیشن پر بیٹنگ کا موقع ملے تو تیار رہتا ہوں، مجھے مختلف نمبروں پر بیٹنگ کرنے میں کوئی مسئلہ نہیں، میرا مقصد ٹیم کے لیے پرفارمنس دینا ہوتا ہے ۔ بابر اعظم سمیت سینئر کھلاڑیوں سے بیٹنگ کے مختلف پہلوؤں پر سیکھتا رہتا ہوں۔ البتہ سینئر کھلاڑی جتنا بھی سمجھا لیں لیکن محنت کھلاڑی نے انفرادی طور پر خود کرنی ہوتی ہے ۔ جتنا بھی بڑا بالر یا بیٹر کیوں نا ہو، میچ میں پریشر دونوں اطراف ہوتا ہے ۔ کبھی کامیابی ملتی ہے تو کبھی نہیں، لیکن میرا ہدف اپنی شاٹس کے ذریعے بالر پر پہلے حاوی ہونا ہوتا ہے ، کھلاڑی کا اعتماد بہت ضروری ہے ، کانفیڈنس ہوگا تو پرفارمنس بھی ملے گی۔ خیبر پختونخوا کے کھلاڑیوں کا زیادہ قومی کرکٹ ٹیم میں آنے کا راز صرف محنت ہے ۔
