ٹینس کی دنیا میں مرد اور خاتون کھلاڑی کا انوکھا مقابلہ
لاہور(سپورٹس ڈیسک)ٹینس میں انوکھا مقابلہ ، ویمن ورلڈ نمبر ون بیلاروس کی ارینا سبالینکا آسٹریلیا کے ٹینس سٹارنک کرگیوس کا سامنا کریں گی۔۔۔
ٹینس کی دنیا میں مرد اور خاتون کا یہ مقابلہ دبئی میں کل ہوگا۔27 سالہ ارینا سبالینکا 30 سال کے سابق ویمبلڈن فائنلسٹ کرگیوس کے خلاف ٹینس کے نمائشی میچ میں مد مقابل ہوں گی، کرگیوس نے ستمبر میں سبالینکا کو مقابلے کا چیلنج دیا تھا، ایک انٹرویو میں انہوں نے کہا کہ سبالینکا کو شکست دینے میں انہیں اپنا سو فیصد دینے کی ضرورت بھی پیش نہیں آئے گی، خواتین مردوں کی تیز سروسز کا مقابلہ نہیں کرسکتیں۔سبالینکا نے حریف کو جواب دیتے ہوئے کہا کہ وہ کرگیوس کے چلینج کو قبول کرنے کے لئے تیار ہیں، اس مقابلے کیلئے پوری دنیا کی ویمن ایتھلیٹس کی نمائندگی کرنا ان کیلئے باعث فخر ہوگا۔ وہ کیریئر کی بہترین ٹینس کرگیوس کے خلاف ہی کھیلیں گی۔یہ بیسٹ آف تھری سیٹس کا مقابلہ ہوگا اور فیصلہ کن سیٹ ٹائی بریکر پر جانے کی صورت میں ٹائی بریکر 10 پوائنٹس کا ہوگا۔
