شوٹنگ کے دوران ریپ کی کوشش کی گئی:عالیہ بھٹ کی والدہ
ریپ کی کوشش کرنیوالے شخص کے خاندان کی وجہ سے خاموش رہی: سونی رضدان
ممبئی (این این آئی)بالی ووڈ کے نامور فلم ساز مہیش بھٹ کی اہلیہ اور اداکارہ عالیہ بھٹ کی والدہ اداکارہ سونی رضدان نے انکشاف کیا ہے کہ ایک بار فلم کی شوٹنگ کے دوران ان کا ریپ کرنے کی کوشش کی گئی۔واقعے پر کئی سال تک بات نہ کرنے کے حوالے سے 61 سالہ سونی رضدان نے کہا کہ انہوں نے ریپ کی کوشش کرنے والے شخص کے خاندان کی وجہ سے خاموشی اختیار کیے رکھی۔اس شخص کا نام سامنے لاکر اس کی شادی شدہ زندگی اور خاندان کو متاثر نہیں کرنا چاہتی تھی۔دی کوئنٹ ویب سائٹ سے بات کرتے ہوئے سونی رضدان نے بتایا کہ کیریئر کی ابتدا میں ایک شادی شدہ شخص نے حملہ کیا تھا، جس میں وہ ناکام ہوگیا۔انہوں نے اس شخص کا نام نہیں بتایا اور نہ ہی یہ بتایا کہ انہیں کس فلم کی شوٹنگ کے دوران نشانہ بنانے کی کوشش کی گئی۔
