پنگانہ لو پاکستانی فنکار بھارتی دراندازی کیخلاف پاک فوج کے شانہ بشانہ
شوبز سٹارز نے بالی ووڈ اداکاروں کی جانب سے بھارتی فضائیہ کے بزدلانہ اقدام کی تعریف اور جنگ کا پرچار کرنے پر انہیں آڑے ہاتھوں لیا ہماری برداشت کا امتحان مت لو،پاکستان تیارہے :فیصل قریشی ،ہم اپنی فوج کو سلام پیش کرتے ہیں :اعجازاسلم ،ہارون شاہد،ماورا،ارمیناخان
لاہور(شوبز ڈیسک)بھارتی فضائیہ کی جانب سے پاکستانی حدود میں فضائی حملے اور جھوٹی سرجیکل سٹرائیک کو جہاں پاک فوج نے ناکام بنادیا وہیں پاکستانی فنکاروں نے بھی اس حملے کی مذمت کی ہے اورپاک فوج کے شانہ بشانہ دشمن کے دانت کھٹے کرنے کے عزم کا اظہار کیاہے ۔تفصیلات کے مطابق بھارتی فضائیہ کی جانب سے رات کے اندھیرے میں بزدلوں کی طرح کئے جانے والے فضائی حملے پر پاکستانی شوبز سٹارز نے نا صرف حملے کی مذمت کی ہے بلکہ بالی ووڈ اداکاروں کی جانب سے اس حملے کی تعریف اور جنگ کا پرچار کرنے پر انہیں آڑے ہاتھوں لیا ہے ۔پاکستانی اداکارہ ارمینا خان نے سوشل میڈیاپر اپنے پیغام میں لکھاکہ ’’میں دیکھ رہی ہوں کچھ بالی ووڈ فنکاروں کے اکاؤنٹس سے جنگ کی حمایت کی جارہی ہے ، ان لوگوں کو دنیا کا مستقبل خطرے میں ڈالنے کی اجازت نہیں دی جاسکتی، آرٹسٹوں کو سمجھدار ہوناچاہئے ‘‘۔اداکار فیصل قریشی نے لکھا ’’ہماری برداشت کا اور امتحان مت لو‘‘، اس کے ساتھ ہی فیصل قریشی نے ایک پاکستانی نیوز اینکر کاپیغام بھی لنک کیاجس میں لکھا ہے ’’ہمیں امن کیلئے آخری حد تک جانا چاہیے لیکن اگر جنگ مسلط کی گئی تو پھر ہم لڑائی میں بھی آخری حد تک جائیں گے ۔ ہم اپنی آئندہ نسلوں کو جنگ کی آگ میں نہیں جھونکنا چاہتے لیکن کوئی راستہ نہ چھوڑاگیا تو ہم اپنے بچوں کیلئے بزدلی کی داستانیں نہیں چھوڑیں گے ‘‘، اس کے ساتھ فیصل قریشی نے ’’پاکستان تیار ہے ‘‘کا ہیش ٹیگ استعمال کیا۔اداکارہ ماورا حسین نے بالی ووڈ اداکاروں کو تنقید کا نشانہ بناتے ہوئے لکھا’’یہ بے تکی چالیں ہیں اور بیوقوف لوگ بیوقوفی کی حمایت کررہے ہیں‘‘۔اداکار اعجاز اسلم نے بھارتیوں کو منہ توڑ جواب دیتے ہوئے کہا کہ ’’ہم اپنی فوج کو سلام پیش کرتے ہیں جنہوں نے بھارتی حملے پر فوری اور بروقت کارروائی کرکے انہیں بھاگنے پر مجبور کردیا، پاکستان تجھے سلام‘‘۔اداکاروگلوکار ہارون شاہد نے اپنی ایک تصویر شیئر کی اور ’’پاکستان زندہ باد‘‘اور’’ ہم سے پنگا نہیں لینا‘‘کے ہیش ٹیگ استعمال کئے ۔
