مہنگائی میں کمی پر پوری توجہ،عوام کیلئے اچھے دن آرہے :مریم نواز
لاہور ،سرگودھا (نیوز ایجنسیاں، سٹاف رپورٹر) وزیراعلیٰ مریم نواز شریف نے کہاہے کہ حکومت کی پوری توجہ مہنگائی میں کمی لاکر عوام کو ریلیف دینے پر مرکوز ہے ،ملک اور عوام کے لئے اچھے دن آ رہے ہیں،متحدہ عرب امارات کی جانب سے 10 ارب ڈالر کی سرمایہ کاری کا خیرمقدم کرتے ہیں۔
وزیر اعلیٰ مریم نوازشریف نے اپنے ایک بیان میں کہاکہ الحمدللہ،متحدہ عرب امارات کی جانب سے 10 ارب ڈالر کی سرمایہ کاری مسلم لیگ ن کی حکومت پر بیرونی اعتماد کاناقابل تردید ثبوت ہے ، مثبت معاشی اعشارئیے پاکستان کیلئے بہتر مستقبل کی نوید ہیں۔وزیراعلیٰ نے کہاکہ پاکستان سٹاک مارکیٹ روز بروز ریکارڈز قائم کر رہی ہے ،100 انڈیکس کا مثبت رحجان خوش آئند ہے ۔ روٹی سمیت دیگر اشیا کے نرخ میں مزید کمی ہوگی، مہنگائی کی شرح میں کمی آئے گی اور پاکستانی کرنسی مستحکم ہوگی۔ مسلم لیگ ن کی حکومت کو تاجروں صنعتکاروں اورسرمایہ کاروں کا اعتماد حاصل ہے ۔ پاکستان میں فارن ڈائریکٹ انوسٹمنٹ کیلئے شہباز شریف حکومت کی کاوشیں قابل تحسین ہیں۔انہوں نے کہاکہ مسلم لیگ ن کی حکومت میں پاکستان اپنا کھویا ہوا مقام حاصل کرے گا۔ دعا ہے اللہ تعالیٰ ترقی میں رکاوٹ ڈالنے والے عناصر کے شر سے پاکستان کو محفوظ رکھے ۔ وزیر اعلیٰ مریم نواز شریف نے مجاہد کالونی سرگودھا میں پیش آنیوالے واقعہ کی مذمت کرتے ہوئے رپورٹ طلب کر لی جبکہ کمشنر سرگودھا اور آر پی اوکو ہدایت کی گئی کہ امن و امان کو یقینی بنانے کیلئے ہر ممکن اقدامات اٹھائے جائیں اور ذمہ داروں کا تعین کر کے انہیں سخت سے سخت سزا دی جائے ۔ مریم نوازشریف نے بارشوں کے دوران آسمانی بجلی اورگھروں کی دیواریں گرنے سے قیمتی انسانی جانوں کے ضیاع پرگہرے دکھ اور افسوس کااظہار کیا اورانتظامیہ کو موثر امدادی کارروائیوں کا حکم دیا ۔
