خدمت کا جذبہ ورثے میں ملا،عوام کیلئے ہر سہولت چاہتی ہوں:مریم نواز
لاہور(سیاسی رپورٹر سے )وزیر اعلیٰ مریم نواز شریف کی شعبہ صحت میں بہتری کی کاوشیں رنگ لانے لگیں،شہروں اور دیہات میں فیلڈ ہسپتال اور کلینک آن ویلز سے روزانہ ہزاروں مریض مستفید ہونے لگے۔
کینسر،ٹی بی اور ہیپاٹائٹس کے مریضوں کومفت ادویات گھر میں ملنے لگیں۔وزیر اعلیٰ نے فیلڈ ہسپتال اور کلینک آن ویلز پراجیکٹ پر اطمینان کا اظہار کرتے ہوئے کہا ہے کہ خدمت کا جذبہ ورثے میں ملا،اپنے عوام کے لئے ہر سہولت چاہتی ہوں۔ پنجاب کے ہر شہری کو خوش،خوشحال اور صحت مند دیکھنا چاہتے ہیں ،ہر سیکٹر میری ترجیح ہے مگر صحت کی سہولتوں کی بہتری پر پوری توجہ ہے ۔شدید گرمی کے باوجود عوام کو گھر کی دہلیز پر علاج کی سہولتیں مہیا کرنے والے ڈاکٹرز اور سٹاف قابل تحسین ہیں ۔مریم نوازشریف نے کہا کہ فیلڈ ہسپتال اور کلینک آن ویلز کے ذریعے ہزاروں مریضوں کے علاج کی سروسز خود مانیٹر کررہی ہوں ۔ہیلتھ ریفارمز کے ثمرات دیکھ کر عوام کی مزیدخدمت کرنے کا جذبہ مزید تقویت پکڑرہا ہے ،جہاں ہیلتھ سہولتوں کا فقدان ہے ، سٹیٹ آف دی آرٹ سہولیات پہنچارہے ہیں ۔انہوں نے کہا کہ صوبے میں مراکز صحت اور ہسپتالوں کی اپ گریڈیشن اور ری ویمپنگ جاری ہے ،صوبے کا پہلا سرکاری کینسر ہسپتال فنکشنل کرنے کیلئے اقدامات کر رہے ہیں،ہر ضلع میں مکمل کارڈیالوجی اور پیڈز بلاک بنانے کے پراجیکٹ پر کام شروع کردیا ہے ۔
لاہور (سٹی رپورٹر سے )وزیر اعلٰی پنجاب مریم نوازشریف نے پرائس کنٹرول کمیٹیوں کی کارکردگی پر ناراضگی کا اظہار کیاہے ،محکمہ خوراک کے ذرائع کا کہناہے کہ مارکیٹوں میں سرکاری نرخوں پر عملدرآمد نہیں کروایا جا رہا، جس پر وزیراعلیٰ نے استفسارکیاہے کہ سرکاری نرخوں پر بازاروں میں اشیاء خورونوش نہیں ملتیں ،اس کا ذمہ دار کون ہے ۔وزیراعلیٰ نے پرائس کنٹرول کمیٹیوں کے نظام کو نئی شکل دینے کا بھی فیصلہ کیا ہے ،اب آئندہ صرف ایک افسر مہنگائی کا ذمہ دار ہو گا۔ذرائع کا کہناہے کہ بازاروں میں پھل اورسبزی سرکاری قیمت سے 30 فی صد زائد قیمت پر فروخت کی جارہی ہیں ۔ آم 145 کے بجائے 250،آڑو 130 کے بجائے 200 ،لوکاٹ 120 کے بجائے 225 ، خربوزہ 70 کے بجائے 100 سے 150 ،تربوز 30 کے بجائے 50سے 60، لیموں 400 کے بجائے 600 روپے میں دستیاب ہیں ،یہی حال سبزیوں کا ہے اور اس مہنگائی کے ذمہ دار آڑھتی اور افسر شاہی ہیں ۔
