مریم نوازکا ایڈز کے سد باب کیلئے موثر اور ٹھوس اقدامات کا حکم
لاہور(دنیانیوز)وزیراعلیٰ مریم نواز شریف نے ایڈز کے رسک پر موجود پاپولیشن کے بچاؤ کے لئے موثر اور ٹھوس اقدامات کا حکم دیا ہے ۔
وزیراعلیٰ کی زیر صدارت خصوصی اجلاس گزشتہ روز ہوا جس میں تحصیل تونسہ کے علاقے میں مبینہ طورپر ایڈز پھیلنے کے اسباب کا جائزہ لیا گیا۔ مریم نوازشریف نے تحصیل تونسہ میں ایڈزکے سدباب کے لئے آپریشنل پلان طلب کرلیا،انہوں نے ایڈز کے پھیلاؤ کے اسباب اور ذمہ داروں کا تعین کرنے کی ہدایت کی۔ اجلاس میں یونیسف،ڈبلیو ایچ اواورمحکمہ ہیلتھ پنجاب کا جوائنٹ مشن قائم کرنے کا فیصلہ کیا گیا۔ ایڈز کے سدباب کیلئے جوائنٹ مشن7تا14اپریل متاثرہ بچوں کی ہسٹری ٹریسنگ کرے گا۔ جوائنٹ مشن ایڈزکنٹر ول اوربچاؤ کیلئے وزیراعلٰی مریم نوازشریف کو تجاویز پیش کرے گا۔ وزیراعلیٰ مریم نوازشریف کی ہدایت پر متاثرہ علاقوں میں ہاؤس ہولڈ سکریننگ بھی کی جائے گی۔ وزیراعلیٰ کی ہدایت پر تونسہ تحصیل ہیڈکوارٹر ہسپتال اوردیگر طبی مراکز میں ایڈ ز کے علاج کیلئے خصوصی مراکز قائم کر دیئے گئے ۔ وزیراعلیٰ مریم نوازشریف نے ایڈز سے متاثرہ بچوں کے مکمل فری علاج کی ہدایت کی اور کہا کہ ایڈز سے متاثرہ بچوں کے علاج میں کوئی کمی یا کوتاہی برادشت نہیں کی جائے گی۔
