مریم اورنگزیب کا بھیس بدل کر جناح، چلڈرن ہسپتال کا دورہ
لاہور(ہیلتھ رپورٹر، مانیٹرنگ ڈیسک)وزیر اعلیٰ پنجاب مریم نواز شریف کی ہدایت پر سینئر صوبائی وزیر مریم اورنگزیب عام شہری بن گئیں، بھیس بدل کر جناح ہسپتال اور چلڈرن ہسپتال کے دورے کئے۔
مریم اورنگزیب عام شہری کی طرح ہسپتال کے مختلف کاؤنٹرز پر گئیں، وارڈز کا معائنہ، ادویات کی مفت فراہمی، صفائی کا جائزہ لیا -مریم اورنگزیب نے زیر علاج مریضوں کے لواحقین سے ادویات کی مفت فراہمی اور علاج کے بارے میں دریافت کیا -مریضوں کے لواحقین نے جناح ہسپتال اور لاہور چلڈرن ہسپتال میں صفائی ستھرائی، علاج اور مفت ادویات کی فراہمی تک صورتحال میں نمایاں بہتری کا اعتراف کیا اور انہوں نے بتایا کہ تمام ادویات ہسپتال کی فارمیسی کے اندر سے مل رہی ہیں۔اعلان کرکے عوام کو بتایا جا رہا تھا کہ ایمرجنسی وارڈ، ہسپتال میں داخل اور عارضی علاج کے لیے آنے والے تمام مریض ہسپتال کے اندر سے دوائی لیں۔ مریم اورنگزیب نے ڈاکٹروں اور طبی عملے کی دستیابی کا بھی جائزہ لیا ۔مریم اورنگزیب ایم ایس آفس بھی گئیں، کارکردگی پر وزیراعلیٰ کی طرف سے ایم ایس سمیت تمام ڈاکٹرز اور عملے کی تعریف کی ۔وزیر اعلیٰ مریم نواز شریف نے عوامی شکایات پر 24 مارچ کو جناح ہسپتال لاہور کا اچانک دورہ کیا تھا ،بدانتظامی پر ایم ایس جناح ہسپتال کو معطل کر دیا تھا ۔وزیر اعلی ٰپنجاب نے مفت ادویات کی عدم فراہمی اور مریضوں کو باہر سے ادویات خرید کر لانے کی صورت حال پر سخت برہمی کا اظہار کیا تھا۔
