اکیلے شخص کا ایک دن میں 45 ہزار سے زائد پودے لگا نے کا ریکارڈ موسمیاتی تبدیلی، جنگلات کی بے دریغ کٹائی اور ماحولیاتی آلودگی آج دنیا کو درپیش بڑے چیلنجز میں شامل ہیں۔ ایسے حالات میں وہ افراد امید کی کرن بن کر سامنے آتے ہیں جو ماحول کے تحفظ کیلئے غیر معمولی کردار ادا کرتے ہیں۔ حال ہی میں کینیڈا کے ایک شہری نے ایک ہی دن میں 45 ہزار سے زائد مینگروو پودے لگا کر نیا ریکارڈ قائم کیا اور درختوں سے اپنی بے مثال محبت کا عملی ثبوت دیا۔ کینیڈا سے تعلق رکھنے والے ماہر ماحولیات انٹوئن موزیس (Antoine Moses ) کینیا کے ساحلی شہر ممباسا کے کیچڑ زدہ ساحلی علاقے میں تقریباً 24 گھنٹے مسلسل مینگروو کے پودے لگانے میں مصروف رہے۔ وہ جھکی ہوئی کمر اور تھکے ہوئے جسم کے باوجود ایک کے بعد ایک پودا زمین میں نصب کرتے رہے۔ سخت مشقت اور تھکا دینے والے کام کے باوجود ان کا عزم متزلزل نہ ہوا۔ ہاتھوں میں مینگروو کے ننھے پودے اور سر پر دھوپ سے بچاؤ کیلئے ٹوپی سجائے، انہوں نے صبح سے رات تک مسلسل محنت جاری رکھی۔ انہوں نے 24 گھنٹوں کے دوران 47,460 مینگروو پودے لگا کر ایک فرد کے ہاتھوں سب سے زیادہ مینگروو درخت لگانے کا عالمی ریکارڈ اپنے نام کیا۔قدرت اور ماحول سے گہری محبت رکھنے والے انٹوئن موزیس کیلئے یہ گنیز ورلڈ ریکارڈز کا دوسرا اعزاز ہے۔ اس سے قبل انہوں نے 2021ء میں بھی ایک منفرد عالمی ریکارڈ قائم کیا تھا، جب انہوں نے کینیڈا کے صوبے البرٹا کے علاقے لاکریٹ میں 24 گھنٹوں کے دوران 23,060 درخت لگا کر ایک فرد کے ہاتھوں سب سے زیادہ درخت لگانے کا اعزاز حاصل کیا تھا۔ اب انہوں نے مینگروو کے 47,460 پودے لگا کر اپنا ہی ریکارڈ مزید شاندار انداز میں آگے بڑھایا ہے۔ ان کی یہ کامیابی ماحولیات کے تحفظ، شجرکاری کے فروغ اور زمین کو سرسبز بنانے کیلئے ان کی غیر معمولی وابستگی اور عزم کا منہ بولتا ثبوت ہے۔اپنی دوسری عالمی کامیابی پر اظہارِ خیال کرتے ہوئے انٹوئن موزیس نے گنیز ورلڈ ریکارڈز سے گفتگو میں کہا کہ دوسرا عالمی اعزاز حاصل کرنا میرے لیے انتہائی خوشی اور اطمینان کا باعث ہے، خاص طور پر یہ جانتے ہوئے کہ اس منصوبے کے مقامی ساحلی آبادیوں، سمندری ماحولیاتی نظام اور کاربن جذب کرنے کی صلاحیت پر مثبت اثرات مرتب ہوں گے۔ میرے لیے اس کامیابی کی سب سے خاص بات یہ ہے کہ یہ صرف ایک ریکارڈ تک محدود نہیں بلکہ ایک بہت بڑے ماحولیاتی مشن کا حصہ ہے۔انٹوئن موزیس کے مطابق ان کا مقصد محض عالمی ریکارڈ قائم کرنا نہیں بلکہ شجرکاری اور مینگروو جنگلات کے فروغ کے ذریعے ماحولیات کے تحفظ، موسمیاتی تبدیلیوں کے اثرات میں کمی اور ساحلی علاقوں کے قدرتی نظام کو مضبوط بنانا بھی ہے۔ ان کا یہ کارنامہ دنیا بھر کے لوگوں کیلئے ایک مثبت پیغام ہے کہ انفرادی کوششیں بھی ماحول کے تحفظ میں غیر معمولی کردار ادا کر سکتی ہیں۔انٹوئن موزیس گزشتہ تقریباً ایک دہائی سے شجرکاری کے شعبے سے وابستہ ہیں۔ ان کے مطابق عالمی ریکارڈ قائم کرنے کیلئے درکار رفتار اور مہارت حاصل کرنے میں انہیں چار سے پانچ سال لگے۔ انہوں نے 2023ء میں گنیز ورلڈ ریکارڈز کو بتایا کہ کینیڈا میں شجرکاری ایک بڑی صنعت کی حیثیت رکھتی ہے، کیونکہ ترقیاتی منصوبوں کیلئے کاٹے جانے والے ہر درخت کے بدلے نیا درخت لگانا ضروری ہوتا ہے۔ یہی وہ ماحول تھا جس نے ان کے اندر فطرت اور ماحولیات سے محبت کو پروان چڑھایا۔ انہوں نے کہا کہ 2021ء میں اپنی زندگی میں 15 لاکھ سے زائد درخت لگانے اور اپنی تکنیک، رفتار اور جسمانی برداشت کو بہتر بنانے کیلئے برسوں محنت کرنے کے بعد عالمی ریکارڈ توڑنا ایک ناقابلِ یقین احساس تھا۔ ان کا کہنا تھا کہ یہ میرے لیے کسی خواب کی تعبیر سے کم نہیں تھا کہ میں نے ایسا کارنامہ انجام دیا جو اس سے پہلے کسی انسان نے نہیں کیا تھا۔ درخت لگانا جسمانی اور ذہنی طور پر انتہائی مشقت طلب کام ہے، میری محنت، لگن اور عزم کو عالمی سطح پر سراہا جانامیرے لیے بہت معنی رکھتا ہے۔اپنا پہلا عالمی ریکارڈ قائم کرنے کے بعد انٹوئن موزیس نے سوشل میڈیا پر اپنی شجرکاری کی سرگرمیوں اور سفر کی ویڈیوز شیئر کرنا شروع کیں۔ ان کے بقول لوگوں کی جانب سے ملنے والا ردِعمل ان کی توقعات سے کہیں زیادہ تھا۔ آج انسٹاگرام پر ان کے 16 لاکھ سے زائد فالوورز ہیں جو ان کے مشن، طرزِ زندگی اور ماحولیات کے تحفظ کیلئے کی جانے والی کاوشوں سے جڑے ہوئے ہیں۔ انٹوئن کا کہنا ہے کہ لوگوں کی زبردست پذیرائی نے مجھے احساس دلایا کہ میں اس کام کو کہیں زیادہ بڑے پیمانے پر آگے بڑھا سکتا ہوں۔ اسی سوچ کے تحت انہوں نے ''انٹوموس‘‘ (Antomos) کے نام سے ایک منصوبے کی بنیاد رکھی، جس کے ذریعے وہ وہ مختلف اداروں اور برانڈز کو دنیا بھر میں شجرکاری اور ماحولیاتی بحالی کے منصوبوں میں سرمایہ کاری کی ترغیب دیتے ہیں۔ ان کے مطابق اس منصوبے کا مقصد حقیقی ماحولیاتی بہتری کو مؤثر ابلاغ اور مکمل شفافیت کے ساتھ جوڑنا ہے، تاکہ لوگ نہ صرف درخت لگانے کے عمل میں شریک ہوں بلکہ اس کے مثبت اثرات کو بھی اپنی آنکھوں سے دیکھ سکیں۔انٹوئن موزیس کی یہ کوشش اس بات کی مثال ہے کہ جدید سوشل میڈیا پلیٹ فارمز کو مثبت سماجی اور ماحولیاتی تبدیلی کیلئے کس طرح مؤثر انداز میں استعمال کیا جا سکتا ہے۔ان کا یہ کارنامہ نہ صرف ایک عالمی ریکارڈ ہے بلکہ ماحول کے تحفظ، ساحلی علاقوں کی بقا اور آنے والی نسلوں کیلئے سرسبز و شاداب زمین چھوڑنے کے عزم کی بھی روشن مثال ہے۔انٹوئن موزیس کی داستان اس حقیقت کا ثبوت ہے کہ مستقل مزاجی، محنت اور ماحول سے محبت انسان کو غیر معمولی کامیابیوں تک پہنچا سکتی ہے، جبکہ شجرکاری نہ صرف زمین کو سرسبز بناتی ہے بلکہ آنے والی نسلوں کیلئے ایک بہتر اور محفوظ ماحول بھی فراہم کرتی ہے۔
