’’کہاں ہے تیری بارش؟‘‘

کراچی کے موسم کے بارے میں لوگوں نے پتا نہیں کیا کیا اڑا رکھا ہے۔ سچ تو یہ ہے کہ یہ معاملہ اب ''بد اچھا، بدنام برا‘‘ کے مرحلے تک پہنچ چکا ہے۔ کراچی کے موسم کو اس قدر غیر یقینی بتایا جاتا رہا ہے کہ اس معاملے میں اردو شاعری کا روایتی محبوب ہی اُس کے مقابل کھڑا ہو سکتا ہے!

''جگنو‘‘ میں نور جہاں نے محمد رفیع کے ساتھ ایک گانا گایا تھا جس میں ایک شعر یہ بھی تھا ؎

کبھی سکھ ہے، کبھی دکھ ہے، ابھی کیا تھا، ابھی کیا ہے

یونہی دنیا بدلتی ہے اِسی کا نام دنیا ہے

بس کچھ ایسا ہی معاملہ کراچی کے موسم کا بھی ہے۔ لوگ گھر سے شدید گرمی کا سوچ کر نکلتے ہیں اور منزل تک پہنچتے پہنچتے ٹھنڈی ہوا کے جھونکوں سے نہال ہوچکے ہوتے ہیں۔ اور واپسی پر بھی ایسی ہی ٹھنڈک متوقع ہوتی ہے مگر پسینے میں شرابور ہوتے ہوئے گھر میں داخل ہوتے ہیں! گویا ؎

مَے خانے میں زاہد سے کوئی چُوک ہوئی ہے

جانے کے قدم اور تھے، آنے کے قدم اور!

کراچی میں جو لوگ موسم کے حوالے سے اٹکل کے گھوڑے دوڑانے کا شوق رکھتے ہیں وہ اکثر ع

گِرتے ہیں شہسوار ہی میدان جنگ میں

کی جیتی جاگتی مثال بن کر رہ جاتے ہیں! ایک تو موسم کے مزاج کا تلوّن اور اُس پر پیش گوئی کی جسارت! یہ تو مرے کو مارے شاہ مدار والا معاملہ ہوا۔ ایک طرف موسم متحرّک رہتا ہے اور دوسری طرف محکمۂ موسمیات... اور اِن دونوں کے درمیان رسّا کشی کا نتیجہ عوام کو بھگتنا پڑتا ہے۔ کچھ کا کچھ ثابت ہونے کے معاملے میں کراچی کا موسم اور اُس کے بارے میں کی جانے والی پیش گوئیاں... دونوں ایک پیج پر براجمان ہیں! محکمۂ موسمیات کی فرضِ منصبی کے درجے میں کی جانے والی پیش گوئیوں پر بھروسہ کرنے والوں کو لوگوں نے اکثر ع

غضب کیا تِرے وعدے پہ اعتبار کیا

گنگناتے ہوئے (اپنی) عقل کا پیار بھرا، ادبیت سے مُزیّن ماتم کرتے دیکھا ہے!

محکمۂ موسمیات کی بیشتر پیش گوئیاں عین موقع پر یوں دھوکا دے جاتی ہیں کہ لوگوں کے پاس دہائی دینے کے سوا کوئی آپشن نہیں بچتا۔ ایسے مواقع پر میر تقی میرؔ یاد آئے بغیر نہیں رہتے ع

کیا کروں گر نہ کروں چاک گریباں اپنا

کراچی کے چیف میٹرولوجسٹ عبدالرشید کا شِکوہ ہے کہ لوگ موسم سے متعلق پیش گوئی کو حرفِ آخر کے درجے میں رکھ کر دیکھتے اور پرکھتے ہیں۔ روزنامہ دنیا سے خصوصی انٹرویو میں عبدالرشید نے دل کی باتیں کھل کر بیان کی ہیں۔ ان کا کہنا ہے ''موسم کی پیش گوئی جدید ترین آلات کی مدد سے جمع کیے جانے والے ڈیٹا کو بنیاد بناکر کی جاتی ہے۔ پیش گوئی غلط بھی ثابت ہو سکتی ہے۔ اگر ہوا کا رخ تبدیل ہو جائے تو موسم بدل جاتا ہے۔ دنیا بھر میں ایسا ہوتا ہے یعنی ہوا بے وفائی کر جاتی ہے مگر بات کا بتنگڑ نہیں بنایا جاتا۔ ہمارے ہاں، معاملہ یہ ہے کہ پیش گوئی سے ہٹ کر کچھ ہو جائے تو یار لوگ ڈھول پیٹنا شروع کر دیتے ہیں‘‘۔

عبدالرشید صاحب کا شِکوہ کچھ ایسا بے جا بھی نہیں۔ غلطی کی تھوڑی بہت گنجائش تو ہونی ہی چاہیے۔ اکثر ایسا ہوا ہے کہ پیش گوئی اور اصل موسم ایک دوسرے کی بالکل مخالف سمت سفر کر رہے ہوتے ہیں۔

محکمۂ موسمیات کراچی کے ایک اعلیٰ افسر نے ایک بار آف دی ریکارڈ شِکوہ کیا تھا کہ موسم سے متعلق کسی پیش گوئی کے غلط ثابت ہونے یا مکمل طور پر درست ثابت نہ ہونے پر لوگ انتہائی ہتک آمیز رویہ اپناتے ہیں۔ انہوں نے مثال دیتے ہوئے بتایا کہ ایک بار کسی میڈیا آؤٹ لیٹ سے فون آیا اور جیسے ہی ریسور اٹھایا، دوسری طرف سے آواز آئی ''کہاں ہے تیری بارش؟‘‘

یہ تو انتہا ہو گئی۔ موسمیات کے ماہرین بھی انسان ہی ہوتے ہیں، اُن سے بھی غلطی سرزد ہو سکتی ہے۔ وہ جدید ترین آلات کی بنیاد پر جمع کیے جانے والے ڈیٹا ہی کی بنیاد پر کوئی رائے قائم کرتے ہیں۔ ایسے میں بات کچھ اِدھر اُدھر بھی ہو سکتی ہے۔ اب یہ تو کوئی بات نہ ہوئی کہ پیش گوئی کو ناکام تو بنائے قدرت اور لوگ فون کرکے ''کہاں ہے تیری بارش؟‘‘ جیسے الفاظ میں طعن و تشنیع کے تیر برسائیں محکمۂ موسمیات پر! غلطی کی تھوڑی بہت گنجائش چھوڑتے ہوئے کچھ نہ کچھ رعایت تو دی جانی ہی چاہیے۔

بات صرف اتنی ہے کہ کراچی کا موسم ستم ظریف ہے۔ اور یہ ستم ظریفی بھی موسم کے مزاج میں پائی جانے والی کسی ٹیڑھ کا نتیجہ نہیں۔ قصہ یوں ہے کہ کراچی سمندر کے کنارے آباد ہے۔ سمندر رنگ بدلے نہ بدلے، موڈ تو بدلتا ہی رہتا ہے۔ سمندر کے مزاج میں پایا جانے والا تلوّن کراچی کے موسم پر اثر انداز نہ ہو یہ تو ممکن ہی نہیں۔ اتنی سی بات ہے اور بدنامی جھیلنا پڑتی ہے محکمۂ موسمیات کو۔ کوئی سمندر کے کنارے پہنچ کر اُسے للکارتے ہوئے نہیں پوچھتا کہ اوئے سمندرا! کیوں روک دی بارش!

کبھی کبھی کراچی کا موسم ایسا سماں بھی پیدا کر دیتا ہے کہ لوگ محکمۂ موسمیات کو دعائیں دیتے ہیں۔ دعائیں اس لیے کہ اُس نے کوئی پیش گوئی نہیں کی ہوئی ہوتی! یعنی سرپرائز کا مزا آ جاتا ہے۔ بقول غالبؔ ؎

نوازش ہائے بے جا دیکھتا ہوں

شکایت ہائے رنگیں کا گلہ کیا

محکمۂ موسمیات اور موسم کے درمیان چونکہ عام طور پر ''چھتیس کا آنکڑا‘‘ رہتا ہے اس لیے ہوتا یہ ہے کہ بارش کی پیش گوئی کی گئی ہو تو بادل چھٹ جاتے ہیں، تیز دھوپ نکل آتی ہے اور اگر تیز دھوپ کے حوالے سے انتباہ کیا گیا ہو تو گھنگھور گھٹا چھا جاتی ہے اور بے موسم کی بوندیں برس کر محکمۂ موسمیات کی کارکردگی پر پانی پھیر دیتی ہیں! ایسی ہی کیفیت کے حوالے سے خاقانیٔ ہند شیخ ابراہیم ذوقؔ نے کہا ہے ؎

ایک آنسو نے ڈبویا مجھ کو اُن کی بزم میں

بوند بھر پانی سے ساری آبرو پانی ہوئی!

کبھی کبھی یوں بھی ہوتا ہے کہ ایک دن کی بارش کو بنیاد بناکر محکمۂ موسمیات پیش گوئی کرتا ہے کہ ہفتہ بھر مطلع ابر آلود رہے گا اور پھر یوں ہوتا ہے کہ اگلے ہی دن سارے بادل دکان بڑھا جاتے ہیں! ع

خواب تھا جو کچھ کہ دیکھا، جو سُنا افسانہ تھا!

انٹرویو میں عبدالرشید نے یہ بھی بتایا کہ موسم کے بارے میں پیش گوئی محض اپنے ملک یا چند علاقوں کا ڈیٹا جمع کرکے نہیں کی جا سکتی۔ ڈیٹا ہمسایا ممالک سے بھی شیئر کرنا پڑتا ہے۔ اِس سے یہ بھی اندازہ ہوا کہ پیش گوئی غلط نکلنے یا ناکام ثابت ہونے پر محض اپنے محکمۂ موسمیات کو موردِ الزام ٹھہرانا درست نہیں، الزام تراشی کے دائرے کو وسعت دے کر پڑوسیوں کے متعلقہ حکام کو کو بھی مطعون و معتوب کیا جا سکتا ہے اور اُن کے گریبان تھام کر بھی ''کہاں ہے تیری بارش؟‘‘ کا نعرۂ مستانہ لگایا جا سکتا ہے! عبدالرشید صاحب کو ہم یہ مشورہ ضرور دیں گے کہ موسم کا ڈیٹا پڑوسیوں سے شیئر کرتے وقت محتاط رہا کریں۔ ع

غیروں پہ کھل نہ جائے کہیں راز دیکھنا

محکمۂ موسمیات اور بالخصوص عبدالرشید صاحب سے ہم یہی کہنا چاہیں گے کہ جب سب کچھ اپنے کہے کے برعکس ہو رہا ہو تو وہی کرنا چاہیے جو مومن خاں مومنؔ نے کیا۔ مومنؔ نے طے کیا تھا ؎

مانگا کریں گے اب سے دعا ہجرِ یار کی

آخر تو دشمنی ہے اثر کو دعا کے ساتھ!

روزنامہ دنیا ایپ انسٹال کریں