اندھے کی لاٹھی

کس طرح ممکن ہو کہ کسی کا اپنا گھر درست نہ ہو اور وہ دوسروں کے گھروں میں درستی یقینی بنانے میں کامیاب ہوجائے؟ دوسروں کی آنکھ میں تنکا دیکھ کر ''تڑپنے‘‘ والے ایسے ''خدائی خدمت گار‘‘ بھی آپ نے دیکھے ہوں گے‘ جن کی اپنی آنکھ میں شہتیر پڑے ہیں‘ مگر اُنہیں یہ شہتیر نکالنے کی کیا‘ اُن کے بارے میں سوچنے کی بھی فرصت نہیں۔ ع

سب کا تو گریباں سی ڈالا‘ اپنا ہی گریباں بھول گئے

اپنی خزاؤں سے بہ طریقِ احسن نپٹنے کی ذرا بھی فکر نہیں۔ کوئی غم اگر ہے‘ تو بس یہ کہ دوسروں کی زندگی میں بہار آجائے۔ کسی کو اس روش پر گامزن دیکھ کر دنیا کیا کرسکتی ہے؟ صرف ہنس سکتی ہے‘ اور کیا!

انسان مسائل اور پیچیدگیوں کا مجموعہ ہے۔ اُس کی ایک بڑی نفسی پیچیدگی یہ بھی ہے کہ اپنے آپ کو راہِ راست پر گامزن کرنے کی بجائے پوری دنیا کو اپنی مرضی کے راستے پر چلانے کے لیے کوشاں رہتا ہے! کچھ ایسی ہی نفسی پیچیدگی کا مظاہرہ بھارت کی انتہا پسند ہندو لیڈر سادھوی پراچی نے بھی کیا ہے۔ وشو ہندو پریشد کی رہنما نے مسلم لڑکیوں کو ''راہِ راست‘‘ پر لانے کی اپنی سی کوشش کرتے ہوئے ''مخلصانہ‘‘ مشورہ دیا ہے کہ وہ ہندو اِزم کو اپنائیں اور ہندو لڑکوں سے شادی کرکے پُرسکون زندگی بسر کریں۔

میڈیا سے گفتگو کے دوران اسلام کے خلاف بلا تکان بولنے اور مسلم لڑکیوں کو ہندو ازم کی سائے میں پناہ لینے کا مشورہ دینے والی سادھوی جی کو اچانک یاد آگیا کہ خود ہندو ازم میں عورت کی حیثیت ایسی گئی گزری ہے کہ اس معاملے کا دفاع کرتے ہوئے انسان کو ظرف اور ضمیر سمیت بہت کچھ ایک طرف رکھ دینا پڑتا ہے! کچھ دن قبل ہمیر پور کے ایک مندر میں کوئی عام عورت نہیں‘ بلکہ حکمران بھارتیہ جنتا پارٹی کی ایک ایم ایل اے (ریاستی اسمبلی کی رکن) نے قدم رکھا‘ تو ہنگامہ برپا ہوگیا۔ مندر کے مہا پجاری اور انتظامیہ کو یہ بات ذرا بھی نہ گوارا تھی کہ ایک عورت مندر میں قدم رکھے۔ اس ایم ایل اے کے جانے کے بعد مندر کو اچھی طرح دھوکر پاک کیا گیا! یہ بات سادھوی پراچی کے بھی علم میں تھی۔ انہوں نے مسلم لڑکیوں کو ہندو ازم اپنانے کا مشورہ دینے کے ساتھ ساتھ ہندو ازم میں عورت سے روا رکھے جانے والے اس گندے سلوک کی مذمت بھی کی۔ انتہا پسند ہندوؤں کا ایک انتہائی بنیادی مسئلہ یہ ہے کہ وہ جب اسلام اور مسلمانوں کے حوالے سے کچھ سوچنے بیٹھتے ہیں‘ تو سوچنے کی مشین ‘یعنی دماغ کا سوئچ آف کردیتے ہیں! ایک ہی سانس میں کئی متضاد باتیں کر جاتے ہیں اور پھر ہر تضاد کا جواز پیش کرنے کی کوشش میں کامیڈی تھیٹر کا ماحول کھڑا کردیتے ہیں! سادھوی جی نے بھی کچھ ایسا ہی کرنے کی کوشش کی ہے۔

مشکل یہ ہے کہ ڈاکٹر ذاکر نائیک جیسے جدید ترین طریقوں کے تحت اور عام فہم زبان میں تبلیغ کرنے والوں نے پڑھے لکھے ہندوؤں کو غیر معمولی حد تک متاثر کیا ہے۔ آج بھی ہندو لڑکیاں تیزی سے اسلام اس لیے قبول کر رہی ہیں اُنہیں اپنے معاشرتی تانے بانے اور مذہبی سوچ میں پناہ لینے کی گنجائش دکھائی نہیں دیتی۔

مسلمانوں نے اہلِ ہند‘ یعنی مقامی باشندوں پر کم و بیش آٹھ صدیوں تک حکومت کی۔ اس دوران حکمرانی کا معیار مجموعی طور پر خاصا بلند رہا۔ مسلم حکمرانوں نے اسلامی تعلیمات کو‘ شعوری یا تحت الشعوری طور پر‘ کسی نہ کسی حد تک پھیلایا۔ ہندو معاشرے میں جو گھٹن ہزاروں سال سے جڑ پکڑے ہوئے تھی‘ وہ اسلام نے دور کی اور عدمِ مساوات سے آلودہ معاشرے کو مساوات کے درشن کرائے۔ اسلامی تعلیمات اور مسلمانوں کی اجتماعی روش دیکھ کر لاکھوں‘ کروڑوں ہندوؤں نے اسلام قبول کیا۔

مسلمانوں نے تو ہندوؤں پر آٹھ صدیوں تک حکومت کی ‘مگر ہندو ایک دن بھی اُن پر حکومت نہ کرسکے‘ کیونکہ مسلمانوں سے اقتدار انگریزوں نے چھینا تھا اور اُن کے جانے کے بعد جمہوریت آگئی! انتہا پسند ہندوؤں کے نزدیک مسلمانوں سے آٹھ سو سالہ محکومی کا بدلہ لینا بالکل جائز ہے۔ زمانہ کس حد تک بدل چکا ہے‘ اس کی اُنہیں چنداں پروا نہیں۔ وہ صرف یہ چاہتے ہیں کہ کسی نہ کسی طور مسلمانوں کو مزا چکھایا جاتا رہے۔

ہندوؤں کی انتہا پسندی اندھے کی لاٹھی ہے‘ یعنی کسی بھی طرف چل سکتی ہے‘ کسی کا بھی سر پھاڑ سکتی ہے اور پھاڑ رہی ہے۔ 1947ء کے بعد دو غم ہندو انتہا پسندوں اور بنیاد پرستوں کی جان کا روگ ہوئے۔ ایک طرف تو مسلمانوں سے محکومی کا بدلہ نہ لیا جاسکا اور دوسری طرف پاکستان کے قیام کی صورت میں اکھنڈ بھارت اکھنڈ نہ رہا۔ اب اور کچھ تو ممکن نہیں تھا ‘اس لیے بھارت میں صدیوں سے بسے ہوئے مسلمانوں ہی کو الگ تھلگ کرنے کی ٹھانی گئی۔ مسلمانوں کو معاشرے کے مرکزی دھارے سے الگ کرنے کی سوچ پر اب تک عمل کیا جارہا ہے۔ دس دس بارہ بارہ نسلوں سے بھارتی سرزمین پر بسے ہوئے لوگوں کو غیر ملکی قرار دے کر اُن سے گلو خلاصی کی کوشش کی جارہی ہے۔

باضابطہ شہریوں کا ڈیٹا آج کل نیشنل رجسٹر آف سٹیزنز (این آر سی) کے زیر عنوان تیار کیا جارہا ہے۔ آسام میں 40 لاکھ افراد کو این آر سی سے باہر رکھا گیا ہے۔ ان میں بڑی تعداد مسلمانوں کی ہے۔ مغربی بنگال کی وزیر اعلٰی ممتا بینرجی‘ جو بالعموم مسلمانوں کے لیے دل میں نرم گوشہ رکھتی ہیں‘ کھل کر میدان میں آئی ہیں۔ اُن کا کہنا ہے کہ بنگلہ دیش سے آنے والے بنگالی مسلمانوں کو الگ تھلگ کرنے کے نام پر آسام‘ مغربی بنگال اور تری پورہ میں صدیوں سے بسے ہوئے‘ یعنی مسلمانوں کو بھی ملک سے نکالنے کی یا کم از کم شہریت کے تحت تمام حقوق سے محروم رکھنے کی سازش کی جارہی ہے۔ ممتا بینرجی نے اس معاملے کو اجاگر کرتے ہوئے انتباہ کیا ہے کہ مسلمانوں کو الگ تھلگ کرنے کے بھونڈے طریقے اپنائے جاتے رہے‘ تو خانہ جنگی بھی چھڑ سکتی ہے! کانگریس سے تعلق رکھنے والے سابق مرکزی وزیر ششی تھرور پہلے ہی کہہ چکے ہیں کہ انتہا پسند ہندوؤں کی منافرت پرور پالیسیوں سے بھارت میں کئی پاکستان کھڑے ہوسکتے ہیں۔

نریندر مودی بھارت کو براہِ راست مریخ تک لے جانے کا خواب دیکھ رہے ہیں۔ اس طرح کے خوابوں کو شرمندۂ تعبیر کرنے کے لیے سوچ بھی بلند ہونی چاہیے‘ اگر کچھ بننا ہے‘ کچھ کر دکھانا ہے‘ تو اندھے کی لاٹھی والی سوچ ترک کرکے وسیع النظری اپنانے ہی کا آپشن بچا ہے۔ مودی جی کو یاد رکھنا چاہیے کہ انتہا پسندی کو پروان چڑھانے والی ‘اُن کی پالیسی نے بھارت کو اندرونی سطح پر شدید عدم استحکام سے دوچار کر رکھا ہے۔ اب اُنہیں اندھے کی لاٹھی توڑ دینی چاہیے۔

ہندوؤں کی انتہا پسندی اندھے کی لاٹھی ہے‘ یعنی کسی بھی طرف چل سکتی ہے‘ کسی کا بھی سر پھاڑ سکتی ہے اور پھاڑ رہی ہے۔ 1947ء کے بعد دو غم ہندو انتہا پسندوں اور بنیاد پرستوں کی جان کا روگ ہوئے۔