فاٹا کا آئینی میٹرکس

قومی اسمبلی نے اس ہفتے اپنے اختتامی ایام میں ایک تاریخی قانون منظور کیا ہے، جسے برسوں پہلے منظور ہو جانا چاہیے تھا ۔ خاص طور سے پارلیمان نے 228 تائیدی ووٹوں کے ساتھ ... جے یو آئی (ف) اور پختون خوا ملی عوامی پارٹی نے تائید نہیں کی ... فاٹا (The Federally Administered Tribal Areas) کے خیبر پختون خوا کے جزو کی حیثیت سے انضمام کے لیے آئین میں اکتیسویں ترمیم منظور کی ۔ یہ مسودۂ قانون خیبر پختون خوا کی صوبائی اسمبلی سے منظور ہونے کے بعد ہماری قبائلی پٹی میں بسنے والے حقوق سے محروم 50 لاکھ افراد سے ہمارا آئینی وعدہ پورا ہو جائے گا۔

جمہوریت کم از کم اپنی سادہ صورت میں انصاف، مساوات اور انسان کے فطری امکانات کے پنپنے کے لیے نہایت ضروری بنیادی حقوق پورے کیے جانے کے تصورات سے مملو ہوتی ہے ۔ یہ تصور جمہوریت کا بنیادی وعدہ اور بطور نظامِ حکومت اس کی مسلسل کامیابی کی کلید ہے کہ ہر مرد اور عورت ذات پات، عقیدے، ثقافت اور مذہب سے قطعِ نظر برابر ہے اور اسے ریاستی ڈھانچے میں ایک ارادی اور مساوی آواز حاصل ہو گی ۔ یہ بنیادی اصول نہ ہو تو جمہوریت کی بنیاد ہی ریزہ ریزہ ہو جائے گی اور پست ہو کر ایک ایسا نظامِ حکومت بن جائے گی جو آمرانہ حاکمیت سے قابلِ امتیاز نہیں ہو گا ۔

جمہوریت ... ایک آئینی جمہوریت ... کا یہ وعدہ ہماری قبائلی پٹی (فاٹا) کے لوگوں کے لیے نہیں تھا ۔ صدیوں پر محیط قبائلی جنگوں سے بھرے، پہاڑی سلسلوں، فرسودہ رواجوں، سیاسی حقوق سے محروم اور ایک متوازی نظامِ انصاف والے پاکستان کے قبائلی علاقے جدید دور میں فراموش کر دیے جانے والے ایسے تاریخی آثار لگتے ہیں جو وقت میں منجمد ہو چکے ہوں ۔

آزادی کے بعد سات عشرے گزر جانے کے باوجود فاٹا کے باسی کسی نامکمل جمہوری حویلی کے لے پالک بچوں کی طرح ہمارے آئینی تحفظات کے دائرے سے باہر ہیں ۔

اپنی غیر ترمیم شدہ حالت میں آئین کے بارہویں حصے کے تیسرے باب میں '' قبائلی علاقوں ‘‘ کی حکومت اور انتظام سے متعلق خاص شقیں شامل ہیں۔ اس حوالے سے آئین کے آرٹیکل 246 میں علاوہ دوسری باتوں کے '' وفاق کے زیرِ انتظام علاقوں ‘‘ (فاٹا) کا تعین بھی کیا گیا ہے ۔ مزید برآں آرٹیکل 247 صراحت کرتا ہے کہ '' فیڈریشن کی انتظامی اتھارٹی فاٹا تک وسیع کی جائے گی ۔‘‘ اہم امر یہ ہے کہ آئین فیڈریشن کی صرف '' انتظامی اتھارٹی ‘‘ قبائلی علاقوں کو دیتا ہے ۔ یوں ان علاقوں کو مقننہ کے دائرے سے خارج کر دیتا ہے ۔

قبائلی علاقوں کے مقننہ کی اتھارٹی سے خصوصی اخراج کی مزید توضیح کرتے ہوئے آئین کا آرٹیکل 247 (3) خاص طور سے بیان کرتا ہے کہ '' فاٹا پر پارلیمان کے '' کسی ایکٹ کا اطلاق نہیں ‘‘ ہو گا‘ جب تک کہ صدر مملکت ایسا کرنے کی ہدایت جاری نہ کریں ‘‘۔ در حقیقت آئین صدر مملکت کو اجازت دیتا اور اختیار عطا کرتا ہے کہ وہ مقننہ کے منظور کردہ کسی قانون کے قبائلی علاقوں کے کسی مخصوص حصے میں اطلاق کی ہدایت جاری کر سکتے ہیں یا وہ قانون موزوں '' استثنا اور ترمیم و اضافے کے ساتھ مؤثر ‘‘ ہو گا ۔

سادہ الفاظ میں خود پاکستان کا آئین قبائلی علاقوں کے لوگوں سے جمہوریت اور ان پر ان کی آزادانہ بالغ رائے دہی کے مطابق حکومت کرنے کا وعدہ نہیں کرتا ۔ آئین کی یہ شقیں یقینی بناتی ہیں کہ قبائلی علاقوں کے قوانین اور حکومتی ڈھانچہ زیادہ تر ایک فرد یعنی صدر کی مرضی کے تحت ہوں گے ... جنھیں قبائلی علاقوں کے لوگوں نے ( براہِ راست ) منتخب نہیں کیا ۔

واقعتاً دنیا بھر کی جدید جمہوریتوں میں جہاں کہیں بھی حکمرانی کی دستاویز ( یعنی آئین ) کسی خاص آئینی منصب کے حامل فرد کو اضافی انتظامی اتھارٹی دیتی ہے‘ وہاں عموماً آزاد عدلیہ کو ایسے انتظامی اقدامات کا جائزہ لینے کا اتنا ہی اختیار دیتا ہے ۔ بہر حال اس آئینی اور جمہوری اصول کے بر خلاف پاکستان کے آئین کا آرٹیکل 247 (7) اعلان کرتا ہے کہ '' نہ تو سپریم کورٹ اور نہ ہی کوئی ہائی کورٹ قبائلی علاقوں کے ضمن میں آئین کے تحت کسی کارروائی کی مجاز ہوں گی ‘‘ جب تک کہ مقننہ قانون کے ذریعے اس کا اختیار خاص طور سے اسے نہ تفویض کر دے ۔

پاکستان کے آئین کے تحت اس وقت فاٹا کا انتظام خاص قوانین کے تحت چلایا جا رہا ہے جنھیں فرنٹیئر کرائمز ریگولیشنز (ایف سی آر) (The Frontier Crimes Regulations) کہا جاتا ہے۔ فرنٹیئر کرائمز ریگولیشنز کے مطابق ایک فرد کے جرم کی اجتماعی سزا اس کے خاندان یا قبائل کے افراد کو دی جا سکتی ہے اور یہاں روایتی / متوازی عدالتی ڈھانچے ( جرگے ) دیوانی اور فوجداری معاملات میں جرم اور سزا کا تعین کرتے ہیں۔ در ایں حالات '' بنیادی حقوق ‘‘ جن کی ضمانت پاکستان کے آئین میں دی گئی ہے ... بشمول قانون کے مطابق معاملہ کیے جانے کا حق ( آرٹیکل 4 اور 5 )، فرد کا تحفظ ( آرٹیکل 9 )، گرفتاری اور قید سے تحفظ ( آرٹیکل 10 )، دہرا مقدمہ یا خود الزامی کے خلاف تحفظ کا حق ( آرٹیکل 13 )، انسان کے وقار کی حرمت (آرٹیکل 14)، نقل و حرکت کی آزادی ( آرٹیکل 15 )، حقوقِ املاک کا تحفظ ( آرٹیکل 23 اور 24 ) اور شہریوں کی برابری ( آرٹیکل 25 ) ... فاٹا کے باسیوں کو اکثر نہیں دیے جاتے ۔

نئی آئینی ترمیم ہمارے آئینی حقوق اور عدالتی جائزہ فاٹا کے باسیوں کو فراہم کرنے کے لیے آئین کے چھ مختلف آرٹیکلز میں ترمیم کرے گی ( جن میں آرٹیکل 247 بھی شامل ہے )۔ اس کے علاوہ ( فاٹا کے خیبر پختون خوا میں ) انضمام کی ترمیم سینیٹ میں نشستوں کی تعداد 104 سے کم کر کے 96 کر دے گی اور خیبر پختون خوا اسمبلی کی نشستیں بڑھا کر 145 کر دے گی ۔ شاید سب سے اہم بات یہ ہے کہ ترمیم وعدہ کرتی ہے کہ 2018ء کے عام انتخابات کے ایک سال کے اندر اندر فاٹا میں '' آزادنہ و منصفانہ ‘‘ انتخابات منعقد کروائے جائیں گے ۔

پوری انسانی تاریخ میں حکومت کی واحد صورتیں، جنھوں نے اقتدار مقامی لوگوں کو منتقل کرنے کی مزاحمت کی یا جمہوری انتقالِ اقتدار کے طویل مدتی منصوبے کی حوصلہ افزائی کی، ان کے حکمران مطلق اقتدار کے مالک تھے یا نو آبادیاتی آقا تھے ۔ اس ترمیم اور فاٹا کے شہریوں کے ہمارے آئینی تحفظات کے دائرے میں شامل کیے جانے میں پہلے ہی بہت تاخیر ہو چکی ہے ۔ فاٹا کے باسی طویل عرصے سے نو آبادیاتی حالت میں، پاکستان کے صدر ( ان کے وائسرائے ) کی حکمرانی میں جی رہے ہیں۔ پاکستان کے تمام با ضمیر شہریوں کو اس نظامِ حکومت کے خاتمے کا لازماً خیر مقدم کرنا چاہیے۔