آئین کاآرٹیکل 209

اسلام آباد ہائی کورٹ کے جج جسٹس شوکت عزیز صدیقی کی آئین کے آرٹیکل 209کے تحت معزولی سے ان لوگوں کو کسی قسم کی حیرت نہیں ہوئی جو اس کیس کی تفصیلات سے باخبرہیں۔دراصل ان کی اس 'اہم‘ تقریر سے بھی پہلے جسٹس صدیقی کے خلاف ایسے الزامات کا شہرہ تھا جو ان کی اس بینچ سے آئین کے آرٹیکل 209کے تحت معزولی کے لئے کافی تھے۔تاہم اب جب اس معاملے پر سیاسی شور شرابے کے باوجود فیصلہ آچکا ہے تو مناسب ہوگا کہ اس آئینی مسئلے اور عدلیہ کے احتساب سے متعلق وسیع تر بحث پر اس کے اثرات کا تجزیہ کیاجائے۔مختصر یہ کہ 21جولائی 2018ء کو جسٹس شوکت عزیز صدیقی نے راولپنڈی بار ایسوسی ایشن میں ایک تقریر کی جس میں انہوں نے ہمارے نظام عدل میں آئی ایس آئی کی مداخلت سے متعلق الزامات کی بوچھاڑ کر دی ۔ان کے ان سخت الزامات کا مفہوم کچھ یوں تھا کہ آئی ایس آئی احتساب عدالت اور اسلام آباد ہائی کورٹ کے معاملات میں مداخلت کر رہی ہے‘ جس کا مقصد نواز شریف کو بہر صورت قید کی سزا دلوانا اور انتخابی عمل کے دوران انہیں مقید رکھنا تھا۔جب ان کی تقریر کی ویڈیو ریکارڈنگ سوشل اور الیکٹرانک میڈیا پر وائرل ہوئی تو آئی ایس پی آر نے آئی ایس آئی کی طرف سے جج صاحب کے اس بیان کی مذمت کی اور سپریم کورٹ آف پاکستان سے درخواست کی کہ وہ جسٹس صدیقی صاحب کی جانب سے لگائے گئے الزامات کی صداقت جانچنے کے لئے مناسب کارروائی کا آغاز کرے۔اسی دوران جسٹس شوکت صدیقی نے بھی سپریم کورٹ کے چیف جسٹس صاحب سے جو بلحاظ عہدہ سپریم جوڈیشل کونسل کے چیئرمین بھی ہیں‘ سے درخواست کی کہ وہ پیش کردہ حقائق کی سچائی اور صداقت کی جانچ پڑتال کے لئے ایک کمیشن کی تشکیل کریں۔چنانچہ چیف جسٹس آف پاکستان نے اسلام آباد ہائی کورٹ کے چیف جسٹس صاحب کو ہدایت کی کہ وہ جسٹس صدیقی صاحب کے الزامات کی حقیقت کے بارے میں تحریری طور پر اپنی رائے دیں نیز یہ کہ وہ جسٹس شوکت عزیز صدیقی کی تقریر سے متعلق مواد اور ثبوت جمع کر کے مہیا کریں۔

اس کے جواب میں چیف جسٹس اسلام آباد ہائی کورٹ جسٹس کاسی نے جسٹس صدیقی کی جانب سے ان پر عائد کئے گئے الزامات کی دو ٹوک الفاظ میں تردید کی اور چیف جسٹس آف پاکستان کو بھی مطلع کیا کہ ایک تحریری انکوائری کے باوجود ان الزامات کے حق میں انہیں جسٹس صدیقی کی طرف سے ابھی تک کوئی جواب موصول نہیں ہوا۔جسٹس کاسی نے خاص طور پر اس امر کی وضاحت کی کہ آئی ایس آئی یا کسی اور ایجنسی کے کسی ممبر نے سابق وزیر اعظم کو 25جولائی ''الیکشن ڈے‘‘ تک زیر حراست رکھنے کے لئے ان پر کوئی دبائو نہیں ڈالا ؛ چنانچہ 30جولائی 2018ء کو سپریم جوڈیشل کونسل نے آئین کے آرٹیکل 209کے تحت جسٹس صدیقی کے خلاف ریفرنس پر باقاعدہ کارروائی کرنے کا فیصلہ کرلیا۔مناسب ہوگا کہ آگے بڑھنے سے پہلے آئین کی اس متعلقہ شق کا مختصر جائزہ لے لیں۔

آئین کاآرٹیکل 209 ''سپریم جوڈیشل کونسل‘‘کی تشکیل کرتا ہے (جو سپریم کورٹ کے تین سینئرموسٹ جج صاحبان اورہائی کورٹس کے دو سینئرموسٹ جج صاحبان پر مشتمل ہوگا) ْآرٹیکل 209(6)سپریم جوڈیشل کونسل کو یہ اختیار دیتا ہے کہ وہ کسی ایسے جج کی معزولی کی سفارش کرے جو ''اپنے عہدے کے فرائض کی ادائیگی کے لیے نااہل ہو یا مس کنڈکٹ کا قصور وار پایا جائے‘‘۔

اس حوالے سے ہمارا آئین اس امر کی تشریح نہیں کرتا کہ آرٹیکل 209کی رو سے ''مس کنڈکٹ‘‘کے زمرے میں کیا کچھ آتا ہے۔تاہم سپریم جوڈیشل کونسل کا وضع کردہ The Supreme Judicial Council Procedure Of Inquiry 2005 آرٹیکل 209کے تحت فرائض کی موثر ادائیگی کے لئے اس پر کچھ روشنی ڈالتا ہے۔خاص طور پر2005رولز کا رول 3(1)کہتا ہے کہ مس کنڈکٹ کے زمرے میں (i) ایسا طرز عمل جو کسی جج کے شایان شان نہ ہویا (ii)ایسا طرز عمل جو اسلامی جمہوریہ پاکستان کے آئین کے آرٹیکل 209(8)کے تحت جاری کردہ کوڈ آف کنڈکٹ سے مطابقت نہ رکھتا ہو(iii)ایسا کنڈکٹ جو غیر موثر پایا جائے یا وہ مؤثر نہ رہا ہو‘‘۔

ان پیرا میٹرز کے اندر رہتے ہوئے سپریم جوڈیشل کونسل نے طے کردہ قانونی تقاضوں کو مد نظررکھتے ہوئے جسٹس صدیقی کے خلاف ریفرنس پر کارروائی کرنے کا فیصلہ کیا‘ یعنی ایسا کنڈکٹ جو ''کسی جج کے شایان شان نہ ہو‘‘ اور جوڈیشل کوڈ آف کنڈکٹ کی خلاف ورزی ہو۔اس مقصد کے لئے 31جولائی کوجسٹس صدیقی کو شو کاز نوٹس جاری کیا گیا تھاا ور انہیں 15اگست تک اس کا تفصیلی جواب دینے اور 21اگست تک اضافی رد عمل دینے کا کہا گیا تھا۔

بدقسمتی سے جسٹس شوکت عزیز صدیقی اپنے سنگین الزامات کے حق میں ایک بھی قابل قبول ثبوت یا شہادت فراہم کرنے سے قاصر رہے۔دراصل آخر میں جسٹس صدیقی کو اپنے دفاع میں یہ موقف اپنانا چاہیے تھا کہ ''اسلام آباد ہائی کورٹ کے حاضر سروس جج کی حیثیت سے ‘‘ ان کے بیان ہی کو '' الزامات کے لئے کافی ثبوت ‘‘سمجھا جائے۔ یکم اکتوبر کو اٹارنی جنرل نے سپریم جوڈیشل کونسل میں اپنا جواب جمع کرواتے ہوئے اس امر پر زور دیا کہ چونکہ جسٹس صدیقی نے اپنے الزامات کے حق میں کوئی ثبوت فراہم نہیں کیا جو آرٹیکل 209کے تحت وضع کردہ پیرا میٹرز کی خلاف ورزی کے زمرے میں آتا ہے ؛چنانچہ سپریم جوڈیشل کونسل نے اس مسئلے کا بغور جائزہ لیااور اس امر پر زور دیا کہ کونسل کے روبرو بنیادی سوال یہ تھا کہ وہ کھوج لگائے کہ کیا جسٹس صدیقی کی پبلک تقریر ایک جج کے شایان شان کنڈکٹ کے زمرے میں آتی ہے یا نہیں‘تاہم ان کی تقریر کے محرکات ان کے انکوائری کے دائرہ کار میںنہیں آتے۔ آخر کار گیارہ اکتوبر کوکونسل کے تمام ارکان نے مکمل غور خوض کے بعد متفقہ رائے دی کہ ''جسٹس شوکت صدیقی نے ہائی کورٹ کے جج کے شایان شان کنڈکٹ کا مظاہرہ نہیںکیا لہٰذا وہ مس کنڈکٹ کے قصور وار پائے گئے ہیں‘لہٰذا اسلامی جمہوریہ پاکستان کے 1973ء کے آئین کے آرٹیکل 209(6)کے تحت اپنے عہدے سے معزول کئے جانے کے مستحق ہیں‘‘۔

جسٹس صدیقی کی عہدے سے معزولی کی بڑی وجہ عائد کردہ الزامات کی سچائی کے مقابلے میں ان کا کنڈکٹ تھا‘ جو انہوں نے بغیر ثبوت کے ایک پبلک فورم پر سنگین الزامات پر مبنی تقریر کر کے اپنا یا تھا‘ اور اس موقف کے حوالے سے کوئی اعتراض یا استثنیٰ نہیں دیا جا سکتا ۔اس کے متبادل پر بھی غور کر لیتے ہیں۔ایک ایسا عدالتی نظام جس میں ہر جج اپنے شکوے شکایات کا اظہار ایک ٹی وی پریس کانفرنس کے ذریعے کرے جس سے پورے عدالتی نظام کو نقصان پہنچنے کا احتمال ہو‘کیا یہ بات ہماری آئینی جمہوریت میں رہتے ہوئے مناسب ہوگی؟کیا دنیا بھر میں کہیں ایسا سسٹم موجود ہے جہاں ججوں کو ایسی تقاریر کرنے کی اجازت ہو؟اس سے ہمارے عدالتی نظام کے تقدس کا کیا انجام ہوگا اگر ججوں کے انفرادی یا معروضی شکوے شکایتوں کو بریکنگ نیوز کے طور پر پیش کیا جائے۔

پچھلے ایک عشرے سے خصوصا افتخار محمد چوہدری کے عہد سے عدالتوں کو اس بات پر سنگین تنقید کا سامنا رہا ہے کہ آرٹیکل 209کو شاید ہی بروئے کار لایا گیا ہو۔متعدد جج صاحبان کو اس بنا پر تنقید کا سامنا رہا کہ انہوں نے ایگزیکٹو کے خلاف تو احتساب کیا مگر آرٹیکل 209کے تحت عدالتی احتساب کرنے سے گریز کیا۔اب وقت آگیا ہے کہ عدالتیں اور معزز جج صاحبان زیر التوا ریفرنسز کی سماعت کر کے ادارہ جاتی احتساب کو اس کے منطقی انجام تک پہنچانے کی کوشش کریں۔نہ صرف ان ججوں کے خلاف جنہوں نے کوئی غلط کا م کیا ہو بلکہ ان ججوں کے خلاف بھی اقدامات کئے جائیں جن کی عدالتی کارکردگی کو آئینی تحفظ حاصل ہے۔اس عمل سے نہ صرف ججوں کے مقام و مرتبے اور عدالتی کارکردگی میں اضافہ ہوگا‘ بلکہ اس سے ہمارے عدالتی نظام کی فعالیت میں بھی ایک نیا جذبہ پیدا ہوگا۔