آئینی فریم ورک پر نظر ثانی کی ضرورت

چیئرمین سینیٹ صادق سنجرانی کے خلاف تحریک عدم اعتماد کی در پردہ کہانی اور حکومتی اقلیت کے ہاتھوں اپوزیشن اکثریت کی شکست نے ہماری جمہوریت کے تابوت میں آخری کیل ٹھونک دی ہے۔ اہم بات یہ ہے کہ اس نے ہمارے پارلیمانی نظام حکومت کے خلاف ایک نئی فرد جرم عائد کر دی ہے جو اپنی آئینی ذمہ داریاں پوری کرنے میں بری طرح ناکام نظر آتا ہے۔

یہ نفرت انگیز واقعہ ہمیں جمہوریت کے خواب خرگوش سے جگانے کے لئے کافی ہونا چاہئے۔ ہمارا موجودہ پارلیمانی نظام حکومت تسلی بخش کارکردگی دکھانے سے قاصر نظر آتا ہے۔ اس نظام کے علمی فوائد کو تو چھوڑیں، وقت آ گیا ہے کہ ہم پاکستان میںکسی نئے حکومتی نظام کے قیام کے بارے میں سوچ بچار کریں۔ ایک ایسا نظام جو اپنے متعلقہ اداروں کا تمسخر اڑانے کے بجائے جمہوری وعدوں کی تکمیل کر سکے۔

ہمارے میڈیا پر چلنے والی کراہت آمیز باتوں سے قطع نظر حقائق مایوس کن حد تک واضح اور سادہ ہیں۔ جب اپوزیشن جماعتیں احتساب کے عمل میں اپنا دامن نہ بچا سکیں تو انہوں نے حکومت پر جوابی وار کرنے کا فیصلہ کر لیا۔ سینیٹ میں اپنی مجموعی اکثریت سے فائدہ اٹھاتے ہوئے اس نے چیئرمین سینیٹ صادق سنجرانی کو ہٹا کر اپنی مرضی کا چیئرمین لانے کا فیصلہ کر لیا۔ سینیٹ کے اعداد و شمار سے پیش گوئی کی جا سکتی تھی کہ نتائج کیا نکلیں گے۔ 103 کے ایوان میں (اسحاق ڈار کو نکال کر جو حلف اٹھائے بغیر ملک سے فرار ہو گئے تھے) صادق سنجرانی کو پی ٹی آئی اور اس کے اتحادیوں کے صرف 36 ووٹوں کی حمایت حاصل تھی۔ اس کے مقابلے میں اپوزیشن کو67 ارکان کی حمایت حاصل تھی اور صادق سنجرانی کو ہٹانے کے لئے ان میں سے 53 ووٹ درکار تھے۔ اعداد و شمار سے اپوزیشن کی فتح نوشتۂ دیوار تھی۔

مقررہ دن یعنی یکم اگست کو 64 ارکان سینیٹ نے کھڑے ہو کر چیئرمین صادق سنجرانی کے خلاف تحریک عدم اعتماد کی استدعا کی۔ اس اکثریتی مطالبے پر ضابطے کی کارروائی کے لئے خفیہ ووٹ ڈالنے کے لیے کہا گیا (سینیٹ کے مروجہ طریقہ کار کے مطابق)۔ اپنے اپنے چیمبرز میں بیٹھی ساری اپوزیشن قیادت کی نظروں کے سامنے ہر رکن نے اپنا ووٹ کاسٹ کیا۔ جب ذرا گرد تھمی تو چیئرمین صادق سنجرانی کو ہٹانے کے لئے مطلوبہ 53 ووٹوں کے بجائے تحریک عدم اعتماد کے حق میں صرف 50 ووٹ نکلے؛ چنانچہ صادق سنجرانی اپنی چیئرمین شپ بچانے میں کامیاب ہو گئے۔

غصے اور مایوسی سے بھرے اپوزیشن لیڈرز کے پاس اس بات کا کوئی جواب نہ تھا کہ ان کے کن چودہ ارکان نے کھڑے ہونے اور ووٹ ڈالنے کے عمل کے دوران اپنی وفاداریاں تبدیل کر لیں۔

اتنی ہی حیران کن بات یہ ہے کہ تحریک انصاف کے سینیٹرز اور صادق سنجرانی صورت حال کے اس طرح پلٹا کھانے کا جشن منا رہے ہیں اور مبارکباد کے پیغامات وصول کر رہے ہیں۔ وہ کس بات کا جشن منا رہے ہیں؟ اس بات کا کہ ہمارے سینیٹرز موقع محل کے مطابق اپنی وفاداریاں تبدیل کر سکتے ہیں۔ اس بات کا کہ صادق سنجرانی ایک ایسے ایوان کی صدارت فرما رہے ہیں جہاں سیاسی نظریہ یا وفاداری کوئی معنی نہیں رکھتی۔ وفاداری تبدیل کرنے والوں کو خریدا گیا یا ڈرایا دھمکایا گیا، دونوں صورتوں میں وہ اس معزز اور ارفع ترین ایوان میں بیٹھنے کے اہل نہیں ہیں۔ اگر کسی بات کا جشن منایا جا سکتا ہے تو اس فرسودہ نظام کے تابوت میں آخری کیل ٹھونکنے کا جس نے پارلیمانی جمہوریت پر ہمارے ایمان کو متزلزل کر دیا ہے۔

آئیں سچ کو سچ کہنے کی جرأت پیدا کریں۔ پارلیمانی جمہوریت کے تحت ہمارا دستوری نظام حکومتی عملداری کا مظاہرہ کرنے میں بری طرح ناکام ہو چکا ہے۔ اس کی ایک مثال پنجاب اسمبلی ہے جہاں گزشتہ کئی سال سے دھرنے اور واک آئوٹ ہو رہے ہیں جن میںانتہائی غیر پارلیمانی زبان استعمال کی جاتی ہے۔ مسلم لیگ نون کے دور حکومت میں تحریک انصاف کے ارکان نے قانون سازی کا شاید ہی کوئی کام ہونے دیا ہو اور ہمیشہ اسمبلی کی سیڑھیوں میں دھرنا دے کر بیٹھے رہے۔ تحریک انصاف کے پورے ایک سالہ دور حکومت میں مسلم لیگ نون نے اسمبلی میں ہر طرح کی کارروائی روکے رکھی، اس کی ساری توجہ پروڈکشن آرڈر جاری کرانے، میڈیا سے بات چیت کرنے پر رہی جس کا واحد مقصد حمزہ شہباز اور ان کی فیملی کو سیاسی تحفظ فراہم کرنا ہے۔

سندھ کے حالات اس سے بھی بد تر ہیں۔ سپیکر سندھ اسمبلی‘ جو گرفتار ہیں‘ کے پروڈکشن آرڈر جاری کر رکھے ہیں اور انہیں پارلیمانی اجلاسوں کی صدارت کرنے کی اجازت ہے۔ گالم گلوچ اور سنگین دھمکیاں روز کا معمول ہیں۔ حالات کو مزید گمبھیر بنانے کیلئے وزیر اعلیٰ سندھ‘ جنہیں اپنی حکومت کے قانو ن سازی کے ایجنڈے کا دفاع کرنا چاہئے‘ اسمبلی میں آصف علی زرداری اور اومنی گروپ کے ذاتی مالی مفادات کو حلال کی کمائی ثابت کرنے میں مصروف رہتے ہیں جب کہ دوسری طرف تھر میں بچے بھوک اور بیماریوں سے مر رہے ہیں اور اندرون سندھ لا قانونیت کے ڈیرے ہیں‘ ایچ آئی وائرس نے تباہی مچا رکھی ہے، کراچی کی سڑکیں اور گلیاں تعفن سے اٹی پڑی ہیں ہر طرف غلاظت اور کیچڑ بیماریاں پھیلا رہا ہے۔ مگر یہ تمام مسائل سندھ حکومت کا ضمیر جگانے میں ناکام رہے ہیں۔ اس کی ضرورت بھی کیا ہے؟ کون سا بلاول زرداری صاحب کا گھر سیلاب میں بہہ گیا ہے؟

قومی اسمبلی‘ جو پارلیمانی سیاست کا گڑھ ہے‘ سب سے گھنائونی تصویر پیش کرتی ہے۔ تین سال پہلے پانامہ لیکس کے بعد قومی اسمبلی کی ساری کی ساری کارروائی چند خاندانوں کی دولت اور اثاثوں کے دفاع کی نذ ر ہو رہی ہے۔ پہلے نواز شریف تھے جو کہتے تھے ''حضور یہ ہیں وہ ذرائع جن سے یہ اثاثے بنائے گئے‘‘ پھر خواجہ آصف ''کچھ شرم ہوتی ہے، کچھ حیا ہوتی ہے‘‘ کے ساتھ گرجتے برستے رہے۔ پھر فواد چوہدری کے جوابی وار شروع ہو گئے۔ پھر پروڈکشن آرڈر کی سیاست متعارف ہوئی اور شہباز شریف، آصف زرداری‘ خواجہ سعد رفیق اور دوسرے لوگوںکو اسمبلی میں اپنا سیاسی دفاع کرنے کا موقع مل گیا۔ اس عرصے میں مفاد عامہ کے کسی قانون پر ایوان میں بحث ہوئی اور نہ وہ پاس ہوا (سوائے الیکشن ایکٹ 2017ء کے جس کے پس پردہ محرکات سے اب سبھی آگاہ ہیں) اہم بات یہ ہے کہ اس عرصے میں قومی اسمبلی کی کارروائی پر اربوں روپے خرچ ہوئے (ایک اندازے کے مطابق پندرہ ارب روپے ) اور نام کی قانون سازی بھی نہیں ہوئی۔

سچی بات یہ ہے کہ اس میں پارلیمانی طرز حکومت کا کوئی دوش نہیں ہے کیونکہ یہی طرز حکومت دیگر ممالک میں بڑی عمدگی سے کام کر رہا ہے۔ اصل مسئلہ اس نظام پر قابض لوگ ہیں اور وہ طریقہ جس طرح عوام ان کا انتخاب کرتے ہیں۔ وہ نظام جہاں با اثر افراد سیاسی جماعتوں سے زیادہ طاقت ور ہیں‘ وہاں ہمارے انتخابی نظام کے کلچر میں ایک بنیادی تبدیلی کی ضرورت ہے مگر اس خواب کا شرمندۂ تعبیر ہونا اتنا آسان نہیں ہے۔

پھر ہمیں کیا کرنا چاہئے؟ کیا ہمیں مزید کئی عشروں تک ان جھوٹے وعدوں پر تکیہ کرنا چاہئے کہ ایک دن آئے گا جب ہماری پارلیمنٹ کسی کی ذاتی دولت کا دفاع کرنے سے اپنی توجہ ہٹا کر عوام کے اجتماعی مفادات پر مرکوز کرے گی۔ یا پھر ہمیں اپنے سیاسی طرز حکومت میں بنیادی تبدیلیاں متعارف کرنا پڑیں گی تاکہ ایک زیادہ متحرک اور نتیجہ خیز آئینی فریم ورک کام کر سکے؟ اگر آئین اور قانون میں بعض بنیادی تبدیلیاں کر دی جائیں تو کیا جمہوریت پاکستان میں بہتر انداز میں کام کر سکتی ہے؟ اگر ایسا ہے تو وہ کون سی ایسی تبدیلیاں ہیں اور ان پر کس طریقے سے کام ہونا چاہئے؟

یہ وہ سنجیدہ سوالات ہیں جن پر قومی سطح پر بحث کی ضرورت ہے۔ اس سلسلے میں تمام سٹیک ہولڈرز کی طرف سے بھرپور دلائل آنے چاہئیں‘ سب سے زیادہ ان لوگوںکی طرف سے جو اس ملک کے دستور کے اصل محافظ ہیں۔ ہمیں اپنے موجودہ آئینی فریم ورک کے حوالے سے زیادہ خود نمائی پر مبنی اپروچ نہیں اپنانی چاہئے۔

وقت آ گیا ہے کہ ہم نئے آئینی دائرہ کار میں رہتے ہوئے ایک بہتر سماج کے بارے میں سوچ بچار کریں تاکہ جمہوریت کے نام پر عوام سے کئے گئے وعدے احسن انداز میں پورے کئے جا سکیں۔