تدریس کا تخلیقی سفر

گورڈن کالج سے ایم اے کرنے کے بعد بطور لیکچرر میری پہلی تعیناتی گورنمنٹ ڈگری کالج منڈی بہائوالدین میں ہوئی تھی ۔تدریس کے پیشے کا انتخاب میرا شعوری فیصلہ تھا‘ جو میرے ان اساتذہ کا مرہون ِمنت تھا‘ جنہوں نے مجھے تدریس کی لذت سے آشنا کیا۔ ان میں سب سے پہلا نام میرے بی اے کے استاد شیخ اشرف صاحب کاہے۔تدریس کی ساحری کیا ہوتی ہے؟ اس کا اندازہ پہلی بارمجھے شیخ صا حب کی کلاس میں ہوا۔وہ نفسِ مضمون اور طالب علموں کی دلچسپی کے درمیان توازن برقرار رکھنے کا ہنر جانتے تھے ۔ان کی کلاس کا آغاز بڑے دلچسپ انداز سے ہوتا۔ سردیاں ہوں یا گرمیاں جب وہ کلاس میں داخل ہوتے تو ان کے ہاتھ میں چائے کا کپ ہوتا ‘ وہ کرسی پر بیٹھتے اور اپنی پاٹ دار آواز میں پوچھتے Hello young man how are you? fighting fit?اور ہم یک زبان ہو کر کہتے Yes sir۔ان کی شخصیت میں ایک خاص طرح کی دلآویزی تھی اوروہ ابلاغ کے فن سے پوری طرح سے آشنا تھے‘پھر میر ی خوش قسمتی مجھے گورڈن کالج کے انگریزی کے عظیم استاد وکٹر مَل کی کلاس میں لے آئی ۔مَل صاحب خوبصورت حس ِمزاح کے مالک تھے‘ کلاس روم میں اصل زندگی سے مثالیں لا کر ہمارے سیکھنے کے عمل کو بامعنی بنا دیتے ۔وہ کسی شکل یا خیال کی تفہیم کے لئے ہماری زندگیوں سے مثالیں دیتے تو ہمیں بات فوراًسمجھ آ جاتی ۔اور پھر سجاد شیخ صاحب کی کلاس‘جن کی شخصیت سے میں نے تین اہم چیزیں سیکھیں:پابندیٔ وقت‘ پڑھانے سے پہلے لیکچر کی تفصیلی تیاری اور کلاس روم میں ایسے قول و فعل سے گریز ‘جس سے کسی طالب علم کی دل آزاری ہو۔یہ تھے؛ وہ اساتذہ جن کی انسپیریشن نے مجھے تدریس کے سفر پر آمادہ کیا اور اور منڈی بہاؤ الدین اس سفر کا پہل پڑاؤ تھا۔

منڈی بہاؤ الدین کالج کا کیمپس ایک وسیع قطعۂـ اراضی پر واقع تھا۔کیمپس سے ملحق ہاسٹل تھا ‘جہاں دور دراز کے علاقوں سے تعلق رکھنے والے طالب علم رہتے تھے۔مجھے بھی ڈارمیڑی میںدو اور اساتذہ کے ساتھ جگہ مل گئی تھی۔مجھے پڑھانے کے لئے انٹر میڈیٹ اور بی اے کے دو سیکشن دئیے گئے تھے۔ان کے ساتھ ابتدائی کلاسز تعارفی تھیں‘پڑھانے کا اصل مرحلہ اگلے ہفتے سے شروع ہونا تھا۔کالج میں میری آمد کے دوسرے دن ہی کالج کے ایک سنیئر استاد نے مجھے نصیحت کی کہ یہاں کے بچوں کو پڑھنے لکھنے سے کوئی دلچسپی نہیں‘ لہٰذا میں اس کارِ بے کار میں اپنی صلاحیتیں صرف نہ کروں اور یہ کہ بہت جلد مجھے خود بھی اس کا احساس ہو جائے گا۔ ایک سنیئر استاد کی رائے سُن کر میرا دِل جیسے بجھ سا گیا اور تدریس کے سفر کے سارے خواب آغاز سے پہلے ہی بکھرنے لگے ۔اس روز میں ہاسٹل کے کمرے میں میز پر کتابیں رکھ کر لیکچر کے نوٹس بنانے لگا تو میر ے ذہن میںکالج کے سنیئر پروفیسر کی آوازبھنبھنانے لگی ''یہاں کے بچوں کو پڑھنے لکھنے سے کوئی دلچسپی نہیں‘ لہٰذا میں اس کارِ بے کار میں اپنی صلاحیتیں صرف نہ کروں‘ ‘ میں نے کتابوں کو بند کردیا اور میز پر سر رکھ کر آنکھیں بند کر لیں۔اس عالم میں نجانے کتنا وقت گزر گیا۔اچانک مجھے ایک شناسا آواز سنائی دی:Hello young man how are you? fighting fit?۔میں نے ہڑبڑا کر آنکھیں کھولیں اور بے ساختہ جواب دیا Yes sir۔ تب مجھے احساس ہوا کہ میں کمرے میں اکیلا بیٹھا ہوں‘ لیکن شیخ صاحب کی آواز مجھے کئی برس پیچھے لے گئی تھی ۔مجھے یوں لگا میرے اندر ایک نئی طاقت ‘ایک نیا جذبہ آ گیا ہے۔ میں دل لگا کر لیکچر کے لیے نوٹس تیار کرنے لگا۔ اگلے روز جب میں کلاس میںداخل ہو رہا تھا تو مجھے یوں لگا کہ میرے محبوب اساتذہ کی دل آویز یادیں میرے دائیں بائیں چل رہی ہیں‘ مجھے روشنی دکھا رہی ہیں‘ میرا حوصلہ بڑھا رہی ہیں۔

اس روز مجھے کیٹس کی نظم (Ode on a Grecian Urn)پڑھانا تھی۔ اس نظم میں شاعر اپنی دنیا اور آرٹ کی دنیا کا مقابلہ کرتا ہے۔ہماری دنیا جو عارضی ہے اور آرٹ کی دنیا‘ جس کو دوام حاصل ہے۔ یہ نظم ایک برتن کے حوالے سے ہے‘ جس پر تصاویر بنی ہوئی ہیں۔ تصویر میں ایک شخص با نسری بجا رہا ہے ‘کچھ فاصلے پر ایک خوبصورت دوشیزہ کی تصویر ہے ۔ شاعر کے خیال میں عام زندگی میں دو امکانات ہوتے ہیں ایک تو یہ کہ ہم اپنے محبوب کو حاصل کرلیں‘ اس صورت میں محبت میں نہ وہ جوش رہتا ہے‘ نہ ہی والہانہ پن۔ دوسرا امکان یہ ہے کہ ہم محبوب کو حاصل نہیںکرسکتے اور وقت اپنے پنجوں سے حسن کو تاراج کردیتا ہے اور ہم زمانے کے سیلاب میں محبوب کو فراموش کر دیتے ہیں‘ لیکن آرٹ کی دنیا میں ہر چیز کو دام حاصل ہے ‘نہ ہی وہ تصویرمیںدوشیزہ عمر رسیدہ ہوگی‘ نہ ہی بانسری بجانے والا اپنی محبوبہ کو حاصل کر سکے گا اور نہ ہی اُس کی آتشِ شوق کبھی سردہوگی ۔ اس خیال کی تفہیم تھرڈ ایئر کے بچوں کے لیے آسان نہ تھی‘ بھلا نہ ملنا ملنے سے بہتر کیسے ہے؟ اچانک میرے ذہن میں نداؔ فاضلی کا لکھا ہوا گیت آگیا ‘جو اس زمانے میں کافی مقبول تھا ''تُو اس طرح سے میری زندگی میں شامل ہے ‘ جہاں بھی جاؤں یہ لگتا ہے تیری محفل ہے‘‘اس گیت کی دو لائنیں نظم کے خیال کی تشریح کرتی تھیں:

مری تلاش تیری دِل کشی رہے باقی

خدا کرے کہ یہ دیوانگی رہے باقی

کتنی عجیب بات ہے کہ محبوب سے ملنے کی خواہش نہیں کی گئی‘ بلکہ اس کی دل کشی اور اپنی تلاش اور دیوانگی کے دوام کی تمنا کی گئی ہے۔ان تینوں خواہشوں کی تعبیر برتن پر بنی تصویروں میں تھی۔ دوشیزہ جس کی دل کشی ہمیشہ باقی رہے گی۔ دوشیزہ کا چاہنے والا جو ا س کو کبھی پا نہ سکے گا یوں اس کی تلاش اور دیوانگی کبھی ختم نہ ہو گی۔مجھے خوشگوار حیرت ہوئی کہ اس گیت کی مثال سے طالب علموں کو نظم کی تفہیم میں مدد ملی۔تب مجھے شیخ اشرف صاحب اور پروفیسر وکٹر مَل کی کلاسیں یاد آئیں‘ جن میں عام زندگی کے تجربوں اور مثالوں سے تفہیم کے مراحل آسان اور دلچسپ بن جاتے۔اس کلاس نے مجھے اعتماد دیا ۔آنے والے دنوں میں طالب علموں کی کلاس میں بھرپور شرکت سے مجھے ان کی مضمون میں بڑھتی ہوئی دلچسپی کا پتا چلا۔ میں نے طلبا کو یہ پیشکش کی تھی کہ جس کسی کو انگریزی کے مضمون میںکوئی مشکل پیش آئے ‘وہ کالج کے ٹائم کے بعد بلا معاوضہ ہاسٹل میںمجھ سے مدد لے سکتا ہے۔ اس طرح میری مصروفیت اور بڑھ گئی اور وقت گزرنے کا احساس ہی نہیں ہوا۔یوں چار مہینے پلک جھپکتے ہی گزر گئے۔ ایک روز کالج کے پرنسپل ولی محمد صاحب نے مجھے اپنے دفتر بلایا۔ میں ان کے آفس میں داخل ہوا تو انہوں نے کھڑے ہوکر مجھے گلے سے لگا لیا‘ کہنے لگے: بہت عرصے بعد کالج کے طلبا کو انگریزی کی کلاس میں ذو ق و شوق سے جاتے دیکھا ہے۔اس کے بعد ان کے چہرے پر اداسی کی لہر آئی اور گزر گئی۔پھر ہونٹوں پر تبسم لا کر کہنے لگے: آپ کو مبارک ہو آپ کا پبلک سروس کمیشن کے ذریعے لیکچرر شپ کے لیے انتخاب ہو گیا ہے او ر آپ کی اپوائنٹمنٹ آپ کے اپنے شہر راولپنڈی کے ایک کالج میں ہوئی ہے ۔ الوداعی دعوت میں ولی محمد صاحب نے میرے لیے محبت بھرے الفاظ کہے۔ انہوں نے کہا: میرا وہاں مختصر قیام شہابِ ثاقب کی طرح تھا‘ جو ذرا دیر کے لئے افق پر نمودار ہوتا ہے اور آسمان کو روشن کرتا ہوا غائب ہو جاتا ہے۔ مجھے الوداع کہنے کے لیے کچھ اساتذہ اور طالب علم ریلوے سٹیشن تک آئے تھے۔ ٹرین ذرا دیر کو رکی تو میں سب کو خدا حافظ کہہ کر ٹرین پر سوار ہوگیا ۔اب ٹرین تیزی سے آگے بڑھ رہی تھی۔میں نے کھڑکی سے باہر دیکھا تو مجھے یوں لگا دور فضاؤں میں میرے زمانہ ٔطالبعلمی کے اساتذہ کی مہربان آنکھیں مجھے دیکھ رہی ہیں۔ ان آنکھوں میں مسرت کی چمک بھی ہے اور طمانیت کی روشنی بھی!

روزنامہ دنیا ایپ انسٹال کریں