منصور آفاق شہر میں ہے!

منصور آفاق ان دنوں لاہور آئے ہوئے ہیں۔ کالم کے ذریعے پہلے بھی ملاقات ہو جاتی تھی اور ان کی نئی شاعری کی گونج بھی اکثر و بیشتر سنائی دے جاتی۔ ''نیند کی نوٹ بُک‘‘ ان کا غالباً پہلا مجموعۂ کلام تھا۔ اب ''دیوانِ منصور‘‘ کے نام سے ان کا مفصل کام زیر ترتیب ہے جو کم و بیش 900 سے 1000 صفحات کو محیط غزلوں پر مشتمل ہوگا۔ صفحات کی مناسبت سے غزلیں بھی اتنی ہی تعداد میں ہوں گی اور یہ بجائے خود ایک خوشگوار خبر ہے۔

نیا لب و لہجہ اور پیرایۂ اظہار بنانے کی بجائے اس شاعر نے ایک طرح سے زبان کو وسعت دینے کا جو کارنامہ سرانجام دیا ہے‘ اس کی اہمیت اپنی جگہ ہے کہ انہوں نے جگہ جگہ انگریزی الفاظ اس مہارت سے ٹانک دیے ہیں کہ وہ اجنبی اور دوسری زبان کے لگتے ہی نہیں ہیں۔ پھر اُس نے دیارِ غیر میں رہتے ہوئے وہاں اپنے اردگرد پھیلی ہوئی اشیا ء اور ماحول کو بڑی ہُنرمندی سے اپنی گرفت میں لیا ہے اور شاعری کو ایک ایسے نئے ذائقے سے روشناس کرایا ہے جو کم از کم غزل میں پہلے موجود نہیں تھا۔

قوافی کی تلاش اور دریافت اس کے ہاں حیران کُن بھی ہے اور مسرت بخش بھی۔ لطف یہ ہے کہ یہ ہمارے اطراف میں موجود تھے لیکن نظروں سے غائب تھے جو ہمارے سامنے رکھ دیئے گئے ہیں اور ہم حیران ہو جاتے ہیں کہ یہ قوافی پہلے کسی کو کیوں نہیں سوجھے۔ کیونکہ قوافی کے حوالے سے شاعر نہ صرف خود کفیل بلکہ صاحبِ حیثیت واقع ہوا ہے اس لیے اس کی غزل اس وقت تک مکمل نہیں ہوتی جب تک اس کے پاس قافیوں کا ذخیرہ تمام نہیں ہو جاتا؛ چنانچہ اکثر قوافی کو بجا طور پر ان کی دریافت قرار دیا جا سکتا ہے؛ تاہم قابلِ ذکر بات یہ ہے کہ وہ نہ صرف نیا قافیہ دریافت کرتے ہیں بلکہ اسے سلیقے سے استعمال کرنے کے فن سے بھی مکمل طور پر آگاہ ہیں؛ حتیٰ کہ اکثر اوقات قافیے اور اس کے استعمال سے ہی شعر کو چار چاند لگ جاتے ہیں جو کہ واقعتاً ایک قابلِ رشک صورتِ حال ہے۔

ہمارے اردگرد شاعری کے نام پر جو موزوں گوئی ہو رہی ہے اور غزل میں جو ٹریش لکھا جا رہا ہے‘ منصور آفاق کی یہ غزلیں ہوا کے ایک زرخیز جھونکے کی حیثیت رکھتی ہیں۔ اس شاعر نے پہلے اپنے لیے غزل کی ایک فضا بنائی ہے جو دوسروں سے خاصی حد تک مختلف بھی ہے اور تازہ تر بھی‘ اسے کسی لہجے کا نام نہیں دیا جا سکتا بلکہ میں سمجھتا ہوں کہ یہ لہجے سے آگے کی چیز ہے کیونکہ لہجہ بھی ایک حد تک ہی آپ کے ساتھ چلتا ہے۔ اسے قابلِ تقلید بھی نہیں گردانا جا سکتا کیونکہ جس فضا میں اس نے اپنی غزل کا یہ ماحول بنایا ہے‘ وہ فضا ہر کسی کو دستیاب نہیں ہے۔ ہمارے دوست ساقیؔ فاروقی بھی لندن کی اسی فضا میں سانس لیتے ہیں‘ اور کہیں کہیں انہوں نے بھی اپنی غزل میں انگریزی الفاظ استعمال کیے ہیں لیکن منصور آفاق کا سب سے زیادہ زور اسی پر ہے اور اس سے اس نے پورا پورا انصاف بھی کیا ہے اور یہی وجہ ہے کہ یہ شاعری نئی نئی اور تازہ کار بھی لگتی ہے جو کہ معمولی بات نہیں ہے‘ ورنہ غزل میں نیا شعر نکالنا اب کوئی اتنا آسان نہیں رہا۔ اور‘ جیسا کہ اوپر عرض کیا گیا ہے‘ یہ شاعر اپنی مخصوص فضا کے ساتھ ساتھ نئے مضامین بھی لایا ہے‘ حالانکہ غزل میں نئے مضمون کا سلسلہ ایک عرصے سے بند چلا آ رہا ہے۔ پھر اس مخصوص ذخیرۂ الفاظ کی بدولت اس کا شعر کہنے کا کینوس بھی کافی حد تک وسیع ہوا ہے جبکہ کلام میں پختگی ایک اضافی خوبی ہے اور یہ شاعری پڑھتے ہوئے آپ محسوس کرتے ہیں کہ آپ اپنا وقت ضائع نہیں کر رہے بلکہ شاعری کے ایک نئے موسم میں سے گزر رہے ہیں جس میں کہیں ہوا ہے تو کہیں بارش‘ کہیں برف باری ہے تو کہیں دھوپ‘ اور ان سب کے علاوہ ایک ناقابل فراموش کھُلا پن‘ جس کی غزل کو جتنی ضرورت آج ہے‘ شاید پہلے کبھی نہ تھی۔ میں اس مسودے کے نصف سے بھی کم حصے سے ابھی تک گزرا ہوں اور کچھ شعر بھی آپ کے پرمسرت مطالعہ کے لیے نکالے ہیں جو پیش خدمت ہیں:

جتنے موتی گرے آنکھ سے‘ جتنا تیرا خسارہ ہوا

دست بستہ تجھے کہہ رہے ہیں وہ سارا ہمارا ہوا

جا رہا ہے یونہی‘ بس یونہی منزلیں پُشت پر باندھ کر

اک سفر زاد اپنے ہی نقشِ قدم پر اُتارا ہوا

ہے محبت گر تماشا تو تماشا ہی سہی

چل مکانِ یار کے فُٹ پاتھ پر بستر لگا

سمندروں کے اُدھر بھی تری حکومت تھی

سمندروں کے ادھر بھی میں تیرے بس میں رہا

کسی کے لمس کی آتی ہے ایک شب جس میں

کئی برس میں مسلسل اُسی برس میں رہا

جسے مزاج جہاں گرد کا ملا منصور

تمام عمر پرندہ وہی قفس میں رہا