’’مجھ پر وجود آیا ہوا‘‘

افضال نوید کی اس کتاب میں تین طرح کے شعر ہیں۔ ایک تو وہ جو بالکل عام سے ہیں اور دوسرے وہ ‘جن میں پیچیدہ بیانی کا شوق پورا کیا گیا ہے اور جو دو تین بار کی قرأت سے بھی سمجھ میں نہیں آتے اور اگر بہت زور لگانے سے سمجھ میں آ بھی جائیں تو حاصل وصول کچھ نہیں ہوتا اور تیسرے وہ جو شعر بنتے بنتے رہ گئے ہیں۔ آپ کی ضیافتِ طبع کے لئے وہ غزلیں حاضر ہیں:

ہر قطرہ ابر کا جہاں ترسیل کا ہوا/ میں بھی پرندہ آنکھوں کی اک جھیل کا ہوا/ شب بھر ستارے تیرے مجھے جگمگا رہے/ بیکار سربکف تیری تعمیل کا ہوا/ یعنی بکھر بکھر گیا عکس ِ جمال ِ شب/ میں ارتعاشِ آئینہ تکمیل کا ہوا/ باہر نہ قطرہ چھلکا پیالے سے عمر بھر/ جتنا بھی ہو سکا تیری تحویل کا ہوا/ جب تک گزار بیٹھا نہ حصے کی زندگی/ ہمسر دوبارہ صورتِ تبدیل کا ہوا/ میں نے چرایا تھا اُسے اُس سے چرا لیا/ اُس پر کچھ اور سحر مری ڈھیل کا ہوا/ اس کو خبر نہیں تھی کہ متوازی آئیں گے/ سرکش وہ اور نقطۂ تکمیل کاہوا/ مجھ پر بھی کچھ خزاؤں کے ادوار آ گئے/ غنچہ سا میں بھی کلیوں کی تمثیل کا ہوا/ گھر گھاس کی گھنیری ردا میں تھا پہنا جب/ کچھ اور بھی اثر مری تعطیل کا ہوا/ مجھ کو بھی باب باب پہ سر پھینکنا پڑا/ میں بھی غبار رخنۂ تشکیل کا ہوا/ پڑھنا کسی کی آنکھ کا کافی تھا دیکھنا/ میں کیوں‘ اسیرنامۂ تفصیل کا ہوا/ مجھ سے نکل کے خاک وہ سر پھوڑتی مری/ میں بازگشت اپنی ہی ترسیل کا ہوا/ چھوڑی نہ لو سے لو کے نکلنے کی رہ کوئی/ پروانہ چاروں اور میں قندیل کا ہوا/ سویا میں نیل کنٹھ سا چادر کو تان کر/ اسرار نیلگوں تیری شہنیل کا ہوا/ بھائی مجھے نہ اپنی لگی لپٹی بھی نویدؔ/ بے ساختہ میں دوسری تاویل کا ہوا۔ تم نے ہمارے خط کی جو توقیر کر نہیں/ دیکھا تو کیا ٹھہر گیا تصویر کر نہیں/ کیا فائدہ تناؤ کا کڑیوں کے اندروں/ جو جال اختراع کی تعمیر کر نہیں/ تکمیلِ خوں خرابہ سے کیا ہاتھ دھویا وہ/ صیاد نے بھلا دیا زنجیر کر نہیں/ فرصت سے تاک پھلتا رہے ابردوباراں میں/ دیکھا ہے باغ کر اُسے جاگیرکر نہیں/ منفی سے ہوکے راستے مثبت کو جاتے ہیں/ مجھ سا رُکا ہوا بھی جو تدبیر کر نہیں/ مالک کا اور غلام کا خیر ِانا ہو کچھ/ کچھ راہِ سرزنش نہ ہو تحقیر کر نہیں/ اندر کے کھوکھلے در و دیوار بھر جو جائیں/ خوابِ مکیں جو دیکھا ہو تعبیر کر نہیں/ خود میں ہی ایک مٹتی ہوئی سوچ اکٹھی ہو/ مدھم تمام دہر ہو تصویر کر نہیں/ کن رس نہ ہونے کا کسی کو دوش کیسے دیں/ سُر سُچا لگ رہا ہو جو تاثیر کر نہیں/ تہہ داری کیسے صفحے پہ اُترے نشیب کی/ لکھا ہوا ملے بھی جو تسطیر کر نہیں/ ایسے میں کوئی موردِ غلطاں نہ ہو تو کیا/ عہدِ جوانی رکھے نہ جو پیر کر نہیں/ لیکن یہ سوچ کر کوئی نقصان ہو نہ جائے/ پلے پڑے ہیں کس کے جو تقصیر کر نہیں/ کس نے جہاں کو علم سے بے بہرہ کر دیا/ برتاؤ جو بھی دہر کا ہے نیر کر نہیں/ شوشے جو چھوڑے گردشِ ایام رہتے ہیں/ اثبات کر نہیں کبھی توقیر کر نہیں/ رہنا ملائمت میں ہی رہنا ہوا نویدؔ/ حاصل ہے جو سلوک وہ تشہیر کر نہیں۔

اب فنی کوتاہیوں پر کچھ بات ہو جائے‘ جو ایسے سینئر شاعر کے ہاں نہیں ہونی چاہئیں:

نہ کھیلنے سے تو بہتر تھا گو قلاش ہوئے (صفحہ 145) قلاش پر تشدید آئے گی۔سمیٹ لے مجھے اژدھام ختم کر نہ سکوں (صفحہ 176) اژدھام فاعلن کے وزن پر آئے گا۔رخنۂ رہن ِ بھنور ساعت ِ نو کی جانب(صفحہ177) اُردو لفظ کے ساتھ اضافت نہیں لگا سکتے۔ کر کے رکھے جو بے دخل مجھ میں (صفحہ 165) دخل فعل کے وزن پر آئے گا۔ہمارے لب پہ ہیں جو راگ تیری پائل ہیں (صفحہ 204) صحیح لفظ پایل ہے۔نفی سے کوئی بھی اثبات کر نہیں پایا (صفحہ 225) نفی کا یہ وزن درست نہیں۔

'نفی سے کرتی ہے اثبات تراوش گویا ‘(غالبؔ)

کسی بھی کُرے پہ بستی بسانے لگتا ہوں (صفحہ 242) کُرے پر تشدید نہیں ہے۔ہوگا مرا دُھواں میرے شہرِ اداس پر (صفحہ 248)یہاں اضافت نہیں لگا سکتے۔ہندسہ عمومی طور پر دس ہوتا ہے مرا (صفحہ 260) ہندسہ فاعن کے وزن پر آئے گا۔ٹھہرنے والا نہیں پہیہ ٔ تلف کہ روش(صفحہ261) اضافت نہیں لگا سکتے۔

آنگن تھا جس میں نیلگوں طیور اُڑتے تھے (صفحہ 268) طیور پر تشدید نہیں ہے۔ وہ عربی بولتی ہے اور اذاں سے ملتی ہے (صفہ 283) عربی فاعلن کے وزن پر آئے گا۔اوروں کے نظریات سے تنگ آنے لگتا ہوں (صفحہ 289) نظریات فعلاتن کے وزن پر آئے گا۔ پلٹی نقار خانوں سے خاموشی سی کوئی (298)نقار پر تشدید آئے گی۔جہاں پہ پہنچ کے آواز لرزی لوٹ گئی (صفحہ 306) پہنچ کا یہ وزن درست نہیں۔ رہین ِ گنتیٔ القاب کر نہ پاؤں میں (صفحہ 312) یہاں اضافت نہیںلگ سکتے۔جہاں سے ٹوٹا تھا سمبندھ پرانا ڈھونڈتے ہیں (صفحہ 327) سمبندھ فاعلات کے وزن پر ہے۔ لبوں کو کھینچتا سند یسہ جگر گیا ہے (صفحہ 404) اضافت غلط ہے۔

اور‘ اب آخر میں اس کتاب میں سے اپنی پسند کے یہ دو شعر:

مجھ کو اتنی بھی کہاں اپنی خبر ہونی تھی

وہ تو کہیے کہ مری راہ میں جنگل آیا

آسماںاور ہوُا جاتا ہے ہر روز نویدؔ

اُٹھتے رہتے ہیں دُھوئیں اتنے دفینے سے مرے

آج کا مقطع

لمس کی گرمی کہاں سے آئی تھی اس میں‘ ظفرؔ

یہ اگر وہ خود نہیں تھا‘یہ اگر آواز تھی