ترکیہ میں پاکستانی آموں کا جادو چل گیا، انقرہ میں شاندار مینگو فیسٹیول
انقرہ(این این آئی)ترکیہ کے دارالحکومت انقرہ میں پاکستانی سفارتخانے کے زیر اہتمام ‘‘پاکستانی مینگو فیسٹیول’’ کا شاندار انعقاد کیا گیا، جہاں شرکاء کو پاکستان کے لذیذ، خوشبودار اور دنیا بھر میں مشہور آموں سے لطف اندوز ہونے کا موقع ملا۔
تقریب کا آغاز پاکستان کے سفیر ڈاکٹر یوسف جنید کے استقبالیہ کلمات سے ہوا، جنہوں نے آم کو ‘‘پھلوں کا بادشاہ’’ قرار دیتے ہوئے اسے پاکستان کی زرعی شان اور فخر قرار دیا۔ انہوں نے کہا کہ پاکستان آم پیدا کرنے والے بڑے ممالک میں شامل ہے ، جہاں 100 سے زائد اعلیٰ اقسام پیدا ہوتی ہیں، جن میں چونسہ، سندھڑی، انور رٹول، لنگڑا، ملدہ، دوسہری اور فجری شامل ہیں۔سفیر نے پاکستانی کسانوں کو خراج تحسین پیش کرتے ہوئے کہا کہ ان کی انتھک محنت کی بدولت پاکستان کی زرخیز زمینوں نے نایاب ذائقوں کو جنم دیا۔ انہوں نے امید ظاہر کی کہ مستقبل میں ترکیہ کو پاکستانی آموں کی برآمدات میں نمایاں اضافہ ہوگا۔فیسٹیول میں انقرہ کے گورنر واسپ شاہین نے بھی شرکت کی اور پاکستانی آموں کے غیر معمولی ذائقے اور معیار کی تعریف کی۔ تقریب میں شریک مہمانوں نے پاکستانی آموں سے بنی لذیذ اشیاء کا مزہ لیا جن میں چونسہ آم، مینگو شیک، اسموتھی، پڈنگ، آئس کریم، آم کا اچار، چٹنی، آم والا چکن کری، آم کا سلاد اور ساگ مکئی کی روٹی کے ساتھ شامل تھے ۔فیسٹیول میں ترک پارلیمنٹ کے رکن برہان کایاتُرک، ڈی جی سیسریک زہرہ زمرت سلچک، ترک وزارت خارجہ کے افسران، سفارتی نمائندے ، کاروباری شخصیات، ٹی یو جی آئی ڈی ای آر (ترک فوڈ امپورٹرز ایسوسی ایشن)، ٹی یو آر او بی (ترک ہوٹل ایسوسی ایشن)، بڑی ریٹیل چینز اور میڈیا کے نمائندوں نے شرکت کی۔
