جھنگ :محرم الحرام میں امن و امان کا قیام یقینی بنانے کیلئے اجلاس
جھنگ (ڈسٹرکٹ رپورٹر )عشرہ محرم الحرام کے حوالے سے امن و امان کے قیام اور بین المسالک ہم آہنگی کو یقینی بنانے کے لیے ڈپٹی کمشنر علی اکبر بھنڈر، ڈسٹرکٹ پولیس آفیسر کیپٹن ر بلال افتخار کیانی اور پاک آرمی کے افسران کی زیر صدارت ایک اہم اجلاس منعقد ہوا۔
جس میں ضلعی افسران،امن کمیٹی، لائسنس داران، جلوس و مجالس کے منتظمین اور پولیس افسران نے شرکت کی۔ اجلاس کا مقصد محرم الحرام کے دوران سکیورٹی انتظامات کا جائزہ لینا، ممکنہ چیلنجز کی نشاندہی کرنا اور ایک مربوط لائحہ عمل مرتب کرنا تھا۔ڈپٹی کمشنر علی اکبر بھنڈر نے اجلاس سے خطاب میں کہا کہ ملکی سلامتی اور امن و امان کے قیام کیلئے تمام ادارے متحرک ہیں، عوامی تعاون کے بغیر پائیدار امن ممکن نہیں،اجلاس میں تمام شرکاء نے اس عزم کا اظہار کیا کہ وہ محرم الحرام کے دوران ہم آہنگی برقرار رکھنے ، باہمی احترام کے فروغ اور ملک دشمن عناصر کی سازشوں کو ناکام بنانے میں بھرپور کردار ادا کریں گے ۔
