عبدالعلیم خان کی بلوچستان میں نہتے شہریوں کے قتل کی مذمت
اسلام آباد(دنیا رپور ٹ ) بلوچستان میں گزشتہ رات نہتے شہریوں کو دوران سفر قتل کرنے اور دہشتگردی کا نشانہ بنانے کے۔۔
واقعہ کی بھرپور مذمت کرتے ہوئے استحکام پاکستان پارٹی کے صدر اور وفاقی وزیر مواصلات عبدالعلیم خان نے کہا ہے کہ دشمن جنگ کے میدان میں شکست کھانے کے بعد اوچھے ہتھکنڈے استعمال کر رہا ہے اور معصوم شہریوں پر ظلم کر رہا ہے ۔ سکیورٹی ادارے پوری قوت کے ساتھ اس فتنے کو کچلنے کے لئے سرگرم ہیں اور ابھی دو دن پہلے ہی درجنوں دہشتگردوں کو کیفر کردار تک پہنچایا گیا ہے ۔عبدالعلیم خان نے مزید کہا کہ پاک فوج اور سکیوٹی اداروں پر اعتماد، باہمی اتحاد اور قومی جذبہ ہی ہماری مضبوطی کا ضامن ہوگا اور ہمیں یکجہتی سے دہشتگردی کے اس ناسور کا مقابلہ کرنا ہوگا۔ انہوں نے غمزدہ خاندانوں سے اظہار ہمدردی کرتے ہوئے دعا کی کہ اللہ تعالیٰ مرحومین کو جوار رحمت میں جگہ عطا فرمائے اور پسماندگان کو صبر جمیل دے ۔
