سیدپور ماڈل ویلج کی اپ لفٹنگ،تزئین وآرائش کا کام جلد مکمل کیا جائے:چیئرمین سی ڈی اے
اسلام آباد (خصوصی رپورٹر) چیئرمین سی ڈی اے و چیف کمشنر اسلام آباد محمد علی رندھاوا نے دیگر متعلقہ افسران کے ہمراہ گزشتہ روز سیدپور ماڈل ویلج کا دورہ کیا اور وہاں جاری اپ لفٹنگ اور تزئین و آرائش کے حوالے سے جاری کاموں کا جائزہ لیا۔
چیئرمین کو بریفنگ میں بتایا گیا کہ سیدپور ماڈل ویلج کی اپ لفٹنگ اور تزئین و آرائش کا کام تیزی سے جاری ہے اور باکو کے آرکیٹکٹس اور ہارٹیکلچر ماہرین خصوصی طور پر معاونت فراہم کر رہے ہیں۔ چیئرمین نے کہا کہ سیدپور ویلج کی اپ لفٹنگ اور تزئین و آرائش سے نہ صرف شہر کی خوبصورتی میں اضافہ ہوگا بلکہ یہ شہریوں کیلئے ایک پرکشش تفریحی مقام بھی بنے گا۔ سیدپور ویلج کو عالمی معیار کے مطابق ایک سٹیٹ آف دی آرٹ ماڈل میں تبدیل کرنے کیلئے تمام دستیاب وسائل کو بروئے کار لایا جائے، یہاں سیاحوں کیلئے بہترین انتظامات اور تفریحی سہولیات کو یقینی بنایا جائے اور اپ لفٹنگ اور تزئین و آرائش کے کاموں کو جلداز جلد مکمل کیا جائے۔ چیئرمین سی ڈی اے کو بتایا گیا کہ مارگلہ ہلز نیشنل پارک ایریا میں غیر قانونی طور پر قائم کی گئی تعمیرات کے خلاف آپریشن کے نتیجے میں 23کنال اراضی واگزار کرا لی گئی، 13غیر قانونی مکانات کو مسمار کیا گیا ہے۔ چیئر مین نے کہا مارگلہ ہلز نیشنل پارک سمیت تمام علاقوں میں کسی بھی قسم کی تجاوزات یا غیر قانونی قبضے کو برداشت کیا جائے گا اور نہ ہی اسلام آباد کی قدرتی خوبصورتی کے ساتھ کسی کو کھیلنے کی اجازت دی جائے گی۔
