پیشہ ورانہ فرائض ،صحافیوں کا تحفظ یقینی بنایا جائیگا :عطا تارڑ
اسلام آباد(نامہ نگار )وفاقی وزیر اطلاعات ونشریات عطا اللہ تارڑ نے آر آئی یو جے کے صدر طارق ورک کے ساتھ تھانہ نیوٹائون میں پیش آنے والے واقعہ پر تشویش کا اظہار کرتے ہوئے کہا کہ صحافیوں کے وقار، آزادی اور پیشہ ورانہ تحفظ کو ہر سطح پر یقینی بنایا جائے گا۔
وہ گزشتہ روز پی ایف یو جے ، آر آئی یو جے نیشنل پریس کلب اور پارلیمانی رپورٹرز ایسوسی ایشن کے نمائندہ وفد سے ملاقات میں گفتگو کررہے تھے ، اس موقع پر صدر پی ایف یو جے افضل بٹ ،صدر آر آئی یو جے طارق علی ورک ،نیشنل پریس کلب کے صدر اظہر جتوئی سیکرٹری نیئر علی، پارلیمانی رپورٹرز ایسوسی ایشن کے صدر عثمان خان، سیکرٹری پی آر اے نوید اکبر، سینئر جوائنٹ سیکرٹری آر آئی یو جے گلزار خان ممبر ایگزیکٹو غفران چشتی عامر بٹ،مدثر چودھری ،پی آئی او مبشر حسن اور دیگر بھی موجود تھے ، ملاقات کے دوران صدر آر آئی یو جے طارق ورک نے تھانہ نیو ٹاؤن میں پیش آنے والے افسوس ناک وا قعہ کی تفصیلات سے آگاہ کیا ،وفد نے راولپنڈی پولیس بالخصوص سی پی او راولپنڈی خالد ہمدانی بارے اپنے تحفظات کا کھل کر اظہار کیا ،وفاقی وزیر نے تحمل سے وفد کی بات سنی ، انہوں نے آئی جی پنجاب سے بھی بات کی، وفاقی وزیر اطلاعات کا کہنا تھا کہ صحافیوں کو ان کے فرائض کی ادائیگی میں ہر ممکن تعاون اور تحفظ فراہم کریں گے ،حکومت آزاد صحافت کو معاشرتی بہتری کا ستون سمجھتی ہے اور اس کے دفاع کے لئے پرعزم ہے ۔
