جرائم کی وارداتیں تھم نہ سکیں، ڈکیت بے خوف، شہری گھر کی دہلیز پرلٹنے لگے
کراچی (این این آئی)کراچی میں جرائم کی وارداتیں رک نہ سکیں، ڈکیت اب شہریوں سے گھر کی دہلیز پر آکر لوٹ مار کرنے لگے ۔گلبرگ اور عزیز آباد میں مسلح ڈکیتوں نے گھر کے باہر کھڑی گاڑی چوری کی، نوجوان سے اسلحے کے زور پر موبائل اور نقدی چھینی اور فرار ہوگئے ۔
گلبرگ میں دن دہاڑے چار مسلح ڈکیت گاڑی میں آئے ، گھر کے باہر کھڑی سرمئی رنگ کی گاڑی کو کھولنے کی کوشش کی، موقع ملتے ہی ڈکیتوں نے گاڑی کھولی اور با آسانی گاڑی لے کر فرار ہو گئے ۔واقعہ کی سی سی ٹی وی فوٹیج بھی منظر عام پر آئی جس میں مسلح چار ملزمان واردات کرتے دکھائی دے رہے ہیں۔ دوسری طرف عزیز آباد میں گھر کی دہلیز پر نوجوان کو لوٹ لیا گیا۔موٹرسائیکل پر سوار دو مسلح ملزمان نے شہری سے رقم اور موبائل فون چھین لیااور باآسانی فرار ہو گئے ۔اس واقعے کی سی سی ٹی وی فوٹیج بھی سامنے آگئی جس میں دونوں ملزمان کے چہرے بھی واضح ہیں۔
