مچھر مار گلوب سے گھر میں آتشزدگی، 6 بہنیں جھلس گئیں
کراچی (این این آئی)شہر قائد میں مچھروں سے بچنے کیلئے گلوب جلانے سے گھر میں خوفناک آتشزدگی کے باعث 6 کمسن بہنیں جھلس گئیں ۔۔
افسوسناک واقعہ کیماڑی سکندر آباد گلی نمبر 28 میں واقع گھرمیں پیش آیا، اہلخانہ نے گھر میں مچھروں سے بچنے کے لیے گلوب جلایا تھا جس سے بستروں میں آگ لگ گئی۔بچیوں کے ماموں محمد اعظم کے مطابق آگ نے 6 کمسن بچیوں کو اپنی لپیٹ میں لے لیا، جس سے وہ جھلس کر زخمی ہو گئیں۔زخمی ہونے والی بچیوں کو علاقہ مکینوں نے ایدھی چھیپا کے رضاکاروں کے مدد سے سول اسپتال برنس وارڈ منتقل کیا گیا، 4 بچیاں مناحل، علیشاہ، تعبیر اور بشرہ برنس سینٹر میں داخل ہیں جبکہ 2 بچیوں عشا اور عائزہ کو طبی امداد دے کر گھر بھیج دیا گیا۔بچیوں کے ماموں محمد اعظم کا کہنا ہے کہ ان کے والد پنجاب شادی میں گئے ہیں، آگ لگنے سے گھر کو بھی نقصان پہنچا۔محمد اعظم کے مطابق بچیاں سگی بہنیں ہیں اور گھر میں والدہ کے ساتھ مقیم تھیں۔بچیوں کے نانا محمد اکمل کا کہنا تھا کہ اہلخانہ کا آبائی تعلق رحیم یار خان سے ہے ، بچیوں کی عمریں 2 سے 18 سال کے درمیان ہے ، انہوں نے مزید کہا کہ 4 زخمی برنس وارڈ میں داخل بچیوں کی حالت خطرے سے باہر ہے ۔پولیس نے گھر میں آگ گیس لیکج یا سلنڈر پھٹنے کی ابتدائی خبروں کی تردید کرتے ہوئے کہا ہے کہ آگ لگنے کا واقعہ مچھر کو بھگانے والے گلوب کے استعمال سے پیش آیا۔
