سیاست میں انتقام کا عنصر ملک کیلئے نقصاندہ،کاشف شیخ
کراچی (اسٹاف رپورٹر)امیر جماعت اسلامی سندھ کاشف سعید شیخ نے کہا ہے کہ سیاست میں انتقام کا عنصر ملک و جمہوریت کے لیے نقصاندہ ہے ۔ عدل وانصاف کے بغیر کوئی ملک و معاشرہ آگے نہیں بڑھ سکتا۔
دریائے سندھ پر 6 نہروں کی تعمیر سے لیکر لاکھوں ایکڑ زمین کمپنی سرکار کے حوالے کرنا سندھ کے حقوق پر ڈاکہ ہے جوارسا قانون سمیت جمہوریت آئین اور عدل وانصاف کے برخلاف ہے ۔ انہی ناانصافیوں کی وجہ سے ہمارا ملک دو حصوں میں تقسیم اور مشرقی پاکستان بنگلہ دیش بن گیا۔ حکمرانوں کے ہوس اقتدار اور اسٹیبلشمنٹ کی چالاکیوں سے قومی جماعتوں میں بھی خدشات بڑھ رہے ہیں۔ان خیالات کا اظہار انہوں نے 26 جنوری کو حیدرآباد میں منعقد ہونے والی پانی کانفرنس کی تیاریوں و اہداف کے جائزہ اجلاس سے خطاب کے دوران کیا۔صوبائی امیر کا مزید کہنا تھاکہ پانی کانفرنس ان شائاللہ سندھ کے بڑے مسئلہ کے حل کی جانب پیش قدمی ثابت ہو گی اور عوام کے سامنے پیپلز پارٹی کا دہرا معیار جو عوام دشمنی پر مبنی ہے سامنے لائے گی ،اس موقع پر صوبائی نائب امیر محمد افضال آرائیں، جنرل سیکریٹری محمد یوسف، نائب قیمین مولانا آفتاب ملک ، سہیل احمد شارق اور لوئر سندھ کے ضلعی امرا موجود تھے ۔علاوہ ازیں کاشف سعید شیخ اور جنرل سیکریٹری محمد یوسف نے کشمیری حریت پسند رہنما یاسین ملک کی خوشدامن کی وفات پر دلی رنج و غم کا اظہار کیا ہے ۔
