ٹریفک قوانین کی خلاف ورزیوں پر بھاری جرمانے اور ڈرائیونگ کورس لازمی کرنے کی تجویز
کراچی(اسٹاف رپورٹر)چیف سیکرٹری سندھ آصف حیدر شاہ نے کہا ہے کہ ٹریفک قوانین کی خلاف ورزیوں پرسزائیں اورجرمانے بڑھائے جائیں گے ۔
منگل کو ترجمان چیف سیکرٹری سندھ کے مطابق یہ بات انہوں نے ٹریفک قوانین میں اصلاحات سے متعلق سینٹرل پولیس آفس میں اجلاس صدارت کرتے ہوئے کہی۔ اجلاس میں آئی جی سندھ غلام نبی میمن، کراچی کمشنر سید حسن نقوی، سیکرٹری ایکسائز، سیکرٹری قانون، سیکرٹری ٹرانسپورٹ، ایڈیشنل آئی جی کراچی اور ڈی آئی جی ٹریفک سمیت دیگر نے شرکت کی۔اجلاس میں ٹریفک اصلاحات سے متعلق موٹر وہیکل آرڈیننس 1965میں مختلف ترامیم لانے کی منظوری دی گئی۔اجلاس میں ڈی آئی جی ٹریفک اور سیکرٹری ٹرانسپورٹ نے تجویز کردہ ترامیم پر بریفنگ دیتے ہوئے کہا کہ ڈی میرٹ پوائنٹس سسٹم نافذ کر کے ٹریفک خلاف ورزیوں پر ڈرائیورز کو ڈی میرٹ پوائنٹس دیئے جائیں گے ۔اجلاس میں قوانین کی خلاف ورزی پرموٹر بائیک سے لے کر ہیوی ٹرانسپورٹ کیلئے بھاری جرمانے سمیت نئے ڈرائیورز کیلئے ڈرائیونگ کورس کو لازمی کرنے کی تجویز دی گئی۔ اجلاس میں گاڑیوں کی رجسٹریشن کی مدت کو6 ماہ سے کم کر کے ایک ماہ کرنے کی تجویز بھی دی گئی ہے ۔اجلاس میں فیس لیس ٹکٹس سسٹم کی تجویز دی گئی جو خودکار نمبر پلیٹ کی شناخت اورسپیڈ کیمروں سے جرمانے جاری کرے گا۔اجلاس میں تمام کمرشل گاڑیوں میں ٹریکنگ اور سیفٹی ڈیوائسز کی تنصیب کی تجویز سمیت صوبے میں چلنے والی کمرشل گاڑیوں میں ڈیش کیم اور کیبن کیمرا لگانے کی بھی سفارش کی گئی۔
