ایدھی سینٹرزکے 106یتیم افراد کی نادرا میں رجسٹریشن
کراچی(مانیٹرنگ ڈیسک، نیوز ایجنسیاں) نیشنل ڈیٹا بیس اینڈ رجسٹریشن اتھارٹی (نادرا) ریجنل ہیڈآفس کراچی نے خصوصی مہم کے دوران قومی شناخت کے لیے ایدھی سینٹرزکے 106یتیم افراد کی رجسٹریشن کر دی۔
ترجمان نادرا کے مطابق ریجنل ہیڈآفس کراچی نے ایدھی فاؤنڈیشن میں یتیم اور لاوارث افراد کی رجسٹریشن مہم کا انعقاد کیا، ایدھی فاؤنڈیشن کے تعاون سے مہم 8 سے 11 جولائی تک کامیابی سے جاری رہی۔انہوں نے بتایا کہ کراچی میں واقع مختلف ایدھی سینٹرز میں مجموعی طور پر 106 یتیموں کو رجسٹر کیا گیا، رجسٹریشن کا اندارج کروانے والوں میں 46 نابالغ (31 لڑکیاں اور 29لڑکے) شامل ہیں۔ترجمان نادرا کے مطابق رجسٹریشن میں شمولیت قانونی شناخت کے بعد سماجی اور اقتصادی حقوق تک رسائی ہے۔ ڈائریکٹر جنرل نادرا کراچی نے اپنی ٹیم کے ساتھ آپریشنز کا جائزہ لینے کے لیے رجسٹریشن سائٹ کا دورہ کیا اور ڈی جی نادرا نے ایدھی حکام سے مستقبل میں تعاون پر تبادلہ خیال کیا اور انسانی ہمدردی کے اقدامات کے عزم کا اعادہ کیا۔علاوہ ازیں نادرا نے ضلع جنوبی کے شہریوں کی بھرپور سہولت کیلئے ایم اے جناح روڈ پر کانڈا والہ بلڈنگ کی چوتھی منزل پر نئے رجسٹریشن سینٹر میں خدمات کا آغاز کیا ہے۔ رجسٹریشن سینٹر میں صبح 8:30 سے شام 4:30 بجے تک خدمات کی فراہمی بلا تعطل جاری رہے گی۔
