گلشن حدید میں تالا توڑ گروہ کی بڑی واردات ،5دکانیں لوٹ لیں
کراچی(اسٹاف رپورٹر)شہر قائد میں تالا توڑ گروہ نے ایک بڑی واردات کی ہے ، جس میں اس نے 5 دکانیں لوٹ لیں۔
پولیس حکام کے مطابق ضلع ملیر، گلشن حدید میں تالا توڑ گروہ نے ایک واردات میں فیز ون کی مارکیٹ میں پانچ دکانوں کا صفایا کر ڈالا ہے ۔پولیس حکام کے مطابق واردات 5 رکنی گینگ نے کی ہے ، گلشن حدید فیز ون کی مارکیٹ میں ڈاکوں نے پہنچتے ہی سکیورٹی گارڈ کو قابو کر لیا، اور اسے رسیوں سے باندھ کر بے بس کر دیا۔پولیس نے نشان دہی کی کہ ڈاکوں نے واردات میں مارکیٹ کی پانچ بڑی دکانوں کو نشانہ بنایا ہے ، جن میں موبائل فون شاپ، جیولری اور کریانہ اسٹور کو لوٹا گیا، ان دکانوں میں کیش، موبائل فونز، اور سونا موجود تھا۔حکام کا کہنا ہے کہ دکانوں سے دیگر قیمتی سامان بھی چوری کیا گیا ہے ، پولیس کو جیسے ہی واردات کی اطلاع ملی، نفری موقع پر پہنچ گئی، مجموعی طور پر ڈکیتی کے دوران نقصان کا ابھی اندازہ نہیں لگایا جا سکا ہے ، متاثرہ دکان دار تمام نقصانات کا جائزہ لے کر بتائیں گے ۔
