تعلیمی بورڈز میں آٹومیشن،ای مارکنگ سسٹم متعارف کرایاجائیگا
کراچی(این این آئی)وزیر جامعات و تعلیمی بورڈز سندھ محمد اسماعیل راہو نے کہا ہے کہ سندھ حکومت صوبے کے تمام تعلیمی بورڈز میں آٹومیشن اور ای مارکنگ سسٹم متعارف کرانے جا رہی ہے۔
تعلیمی بورڈز میں جاری منصوبے مکمل کیے جائیں گے ، بورڈز کو بہتر بنایا جائے گا، اور صوبے سے کاپی کلچر کے خاتمے کے لیے عملی اقدامات کیے جا رہے ہیں۔آل سندھ پرائیویٹ اسکولز و کالجز تنظیم کی جانب سے ورلڈ ٹیچرز ڈے اور امتحانات میں نمایاں پوزیشن حاصل کرنے والے طلبہ کے اعزاز میں یہ پْروقار تقریب بحریہ آڈیٹوریم کارساز کراچی میں منعقد ہوئی۔تقریب کے مہمانِ خصوصی وزیر جامعات و تعلیمی بورڈز محمد اسماعیل راہو تھے ۔تقریب میں 100 سے زائد نمایاں کارکردگی دکھانے والے طلبہ کو اعزازات سے نوازا گیا،جبکہ اساتذہ کو بھی شیلڈز پیش کی گئیں۔ تقریب کے دوران اساتذہ کے کردار کو خراجِ تحسین پیش کیا گیا اور تعلیم کے فروغ میں ان کی خدمات کو سراہا گیا۔ اسماعیل راہو نے کہا کہ سندھ حکومت نے میرٹ پر لاکھوں اساتذہ بھرتی کیے ہیں، صوبے میں جامعات کی تعداد میں اضافہ کیا گیا ہے تاکہ نوجوان نسل کو تعلیم کے زیادہ مواقع فراہم کیے جا سکیں۔
