نفرت انگیز پریس کانفرنسز کی سیاست کا قائل نہیں ،میئر
سیاسی رسہ کشی اور تعصب کی سیاست کا خاتمہ وقت کی اہم ضرورت ،مرتضیٰ وہابشہر میں کام کر کے جواب دینے پر یقین رکھتا ہوں، ترقیاتی منصوبوں کا افتتاح
کراچی(اسٹاف رپورٹر)میئر کراچی بیرسٹر مرتضیٰ وہاب نے کہا ہے کہ روزانہ تعصب اور نفرت پر مبنی پریس کانفرنسز کی سیاست کا قائل نہیں بلکہ شہر میں کام کر کے جواب دینے پر یقین رکھتا ہوں، اگر دیگر جماعتیں صحیح طرح سے عوامی خدمت کریں تو انہیں مداخلت کی ضرورت نہ پڑے ، ٹاؤنز کو 14 ارب روپے دیئے گئے ہیں جبکہ او زیڈ ٹی کی مد میں 27 ارب روپے موصول ہوئے ہیں اور کلک کے ذریعے 6 ارب روپے مزید ملے ہیں۔ان خیالات کا اظہار انہوں نے اولڈ سٹی ایریا میں محمد شاہ اسٹریٹ کی تعمیر و بحالی کے کام اور دیگر ترقیاتی منصوبوں کا افتتاح کرنے کے موقع پر کیا۔میئر نے مزید کہا کہ پہلے ایک یوسی کو پانچ لاکھ روپے ملتے تھے جو اب بڑھا کر 12 لاکھ روپے کر دیے گئے ہیں، ٹاؤنز کے پاس روڈ کٹنگ کی مد میں 70 کروڑ روپے موجود ہیں، جنہیں عوامی بہتری کے لیے استعمال کیا جائے ، یہ سال کراچی کے لیے ترقی اور بہتری کا سال ہے ۔ اس سال کے ایم سی کی جانب سے 30 ارب روپے شہر کے انفراسٹرکچر کی بہتری پر خرچ کیے جا رہے ہیں، سیاسی رسہ کشی اور تعصب کی سیاست کا خاتمہ وقت کی اہم ضرورت ہے ۔ شہر ایک ہے تو اس کا نظام بھی ایک ہونا چاہیے اور اختیارات کو تقسیم کرنے کے بجائے یکجا کرنا چاہیے ، کے ایم سی کے اکاؤنٹ میں آنے والی ایک ایک پائی عوام کی سہولت پر خرچ کی جا رہی ہے ۔
