تعلیمی اداروں میں سائنسی نمائش کے انعقاد کا فیصلہ
لاہور(ایجوکیشن رپورٹر)انٹرنیشنل سٹیم ڈے کی مناسبت سے پنجاب کے تعلیمی اداروں میں سٹیم سائنسی نمائش کے انعقاد کا فیصلہ کیا گیا ہے۔ اس ضمن میں پنجاب کے تمام پبلک سکولوں کو تیاری کی ہدایت کر دی گئی ہے۔
پروگرام مانیٹرنگ اینڈ امپلیمنٹیشن یونٹ تمام اضلاع میں سٹیم نمائش کا انعقاد یقینی بنائے گا۔ یہ سائنسی نمائش پنجاب بھر میں ضلعی سطح پر مڈل و سیکنڈری سکولوں کے طلبا کے سائنسی ماڈلز پر مشتمل ہوگی۔ سٹیم نمائش کا مقصد طلبا کی تخلیقی صلاحیتوں کو ابھارنا اور سائنس و ٹیکنالوجی، انجینئرنگ، آرٹس و ریاضی کے فروغ کے علاوہ ان میں مذکورہ مضامین و عنوانات کے حوالے سے دلچسپی پیدا کرنا ہے ۔ یہ نمائشیں طلبا کو ہم نصابی سرگرمیوں میں حصہ لینے کی ترغیب دینے ، ان کی تخلیقی صلاحیتوں کو اجاگر کرنے کی غرض سے منعقد کی جا رہی ہیں جو مختلف شعبوں میں طلبا کے جدید خیالات و رجحانات کو اجاگر کرے گی۔ نمائش کیلئے پیش کئے جانے والے ماڈلز کی سکروٹنی کیلئے کمیٹی قائم کر دی ہے جو تمام اضلاع سے جمع ہونے والے ماڈلز کا تکنیکی جائزہ لے گی اور نمائش کیلئے شارٹ لسٹ کرے گی۔
