چینی گروپ کا قائداعظم پارک میں یونٹ لگانے عندیہ
لاہور(خبر نگار)صوبائی وزیر صنعت و تجارت شافع حسین نے قائد اعظم بزنس پارک شیخوپورہ کا دورہ کیا۔ٹیکسٹائل سیکٹر سے وابستہ چین کے سرمایہ کار گروپ چیلنج اپیرل کے چیئرمین مسٹر وانگ بھی صوبائی وزیر کے ہمراہ تھے۔
چیئرمین پیڈمک جاوید اقبال اور ان کی ٹیم نے چین کے گروپ کو سپیشل اکنامک زون میں سرمایہ کاری کے مواقع اور صنعتی انفراسٹرکچر بارے بریفنگ دی۔چین کے گروپ نے قائد اعظم بزنس پارک میں صنعتی یونٹ لگانے کا عندیہ دے دیا۔صوبائی وزیر نے پنجاب کے سپیشل اکنامک زونز میں سرمایہ کاری کے مواقع سے آگاہ کیا۔صوبائی وزیرنے کہاکہ خصوصی اقتصادی زونز میں مقامی اور غیر ملکی سرمایہ کاروں کو خصوصی مراعات حاصل ہیں،یہاں سرمایہ کاری پر 10سال تک انکم ٹیکس کی چھوٹ اور ایک مرتبہ ڈیوٹی فری مشینری درآمد کی سہولت موجود ہے ۔پنجاب غیر ملکی سرمایہ کاروں کے لئے سرمایہ کاری کا پرکشش مقام بن گیا ہے ۔سپیشل اکنامک زونز میں عالمی معیار کا صنعتی انفراسٹرکچر موجود ہے ۔چین کے سرمایہ کاروں کو ترجیحی سہولیات فراہم کی جارہی ہیں۔
