موسمیاتی تبدیلیوں کے اثرات سے نمٹنے کیلئے تربیتی ورکشاپ
مظفر گڑھ(سٹی رپورٹر ) ڈپٹی کمشنر قرۃ العین میمن نے کہا کہ BRAVE منصوبہ ہمارے معاشروں کو موسمیاتی تبدیلیوں کے خطرات سے نمٹنے میں ایک اہم قدم ہے ۔۔۔
ضلع اور صوبے میں موسمیاتی تبدیلیوں کے ہولناک اثرات تباہ کن رہے ہیں، اور میں اس منصوبے کے تحت پیداوار میں اضافہ اور عوام کے لیے غذائی تحفظ کو یقینی بنانے کی کوششوں کو دیکھنے کی منتظر ہوں۔ یہ بات انہوں نے اقوام متحدہ کے ادارہ برائے خوراک و زراعت (ایف اے او) کے زیر اہتمام موسمیاتی تبدیلیوں کے اثرات سے نمٹنے کے لیے ایک تربیتی ورکشاپ سے خطاب کرتے ہوئے کہی، انہوں نے کہا کہ حکومتی محکموں، ترقیاتی شراکت داروں اور مقامی اسٹیک ہولڈرز کو اکٹھا کر کے ، ہم قدرتی آفات اور ماحولیاتی تنزلی کے چیلنجوں کا مؤثر اور مربوط جواب دے سکتے ہیں۔ انہوں نے کہا کہ یہ اقدام نہ صرف فوری امداد فراہم کرے گا، بلکہ ہمارے معاشروں کے لیے طویل المدتی مزاحمت کی بنیاد بھی رکھے گا۔ ڈپٹی کمشنر نے ایف اے او اور دیگر ترقیاتی شراکت داروں کی کوششوں کو سراہا۔ اس منصوبے کا مقصد موسمیاتی تبدیلیوں کے اثرات سے متاثرہ علاقوں میں غذائی تحفظ کو بہتر بنانا، معیشت کو مضبوط کرنا اور موسمیاتی تبدیلیوں کے خلاف مزاحمت کو فروغ دینا ہے ۔ ۔ ورکشاپ میں BRAVE پروگرام کے سٹریٹجک مقاصد پر روشنی ڈالی گئی شرکاء نے فعال طور پر مباحثوں میں حصہ لیا، جس میں ٹیکنیکل ورکنگ گروپ (TWG) کے شرائط کو واضح کیا گیا، جس میں ٹیم کی تشکیل، یونین کونسل، گاؤں اور فائدہ اٹھانے والوں کے انتخاب کے معیارات پر توجہ مرکوز کی گئی۔حکومتی محکموں اور شراکت داروں نے BRAVE کے تحت نافذ کیے جانے والے اہم اقدامات کی مکمل حمایت کا اظہار کیا، جو مظفر گڑھ کے کمزور معاشروں میں موسمیاتی مزاحمت کو مضبوط بنانے ، غذائی تحفظ کو بہتر بنانے اور معیشت کو فروغ دینے پر مرکوز ہیں ۔
