محرم میں امن و امان ہرقیمت پر برقرار رکھا جائیگا:محمد اشرف
بھکر(ڈسٹرکٹ رپورٹر )ڈپٹی کمشنر محمد اشرف نے کہا ہے کہ محرم الحرام کے دوران ضلع میں امن و امان برقرار رکھنے اور بین المذاہب ہم آہنگی کو فروغ دینے کے لیے ضلعی امن کمیٹی کا کردار نہایت اہم ہے۔
یہ بات انہوں نے محرم الحرام کے سلسلے میں ضلعی امن کمیٹی کے خصوصی اجلاس کی صدارت کرتے ہوئے کہی۔اجلاس میں اے ڈی سی جی ارشد وٹو، ایس پی انوسٹی گیشن شوکت، رانا آفتاب احمد خان، مولانا محمد صفی اﷲ، صاحبزادہ منصور سلطان، رانا محمد اشرف خان، علامہ قلب محمد علی شہانی، صاحبزادہ عابد سلطان، سید قیصر عباس نقوی، حاجی محبوب احمد ملک،سید ممتاز حسین شاہ،سید کریم حیدر،قاری عبد الشکور،مولانا ذکا اﷲ خالد،صاحبزادہ عبد الرحیم رضوی،صاحبزادہ عبد العلیم،سید محمد علی،سید مہتاب حسین شاہ،ملک عاشق حسین کھوکھر،مولانا محمد ابوبکر،ملک نزیر حسین کھیمٹہ،ملک محمد امیر اقبال کہاوڑ،ملک محمد اقبال جوڑا اور اقلیتی نمائندے پادری مرقس مسیح سمیت دیگر معزز اراکین نے شرکت کی۔ڈپٹی کمشنر نے اجلاس سے خطاب کرتے ہوئے کہا کہ محرم الحرام کے دوران امن و امان کی فضا کو ہر قیمت پر برقرار رکھا جائے گا۔ضلعی انتظامیہ اور قانون نافذ کرنے والے ادارے مکمل الرٹ ہیں اور حکومت پنجاب کے جاری کردہ ضابطہ اخلاق پر عملدرآمد کو یقینی بنایا جائے گا۔انہوں نے کہا کہ تمام مکاتب فکر کے علما کرام اور سول سوسائٹی باہمی تعاون سے ضلع میں مثالی امن کے قیام میں اپنا بھرپور کردار ادا کریں۔اجلاس میں شریک اراکین نے سکیورٹی انتظامات کو سراہتے ہوئے مطالبہ کیا کہ سوشل میڈیا پر مذہبی منافرت پھیلانے والے عناصر کے خلاف فوری اور سخت کارروائی کی جائے تاکہ ضلع کا پرامن ماحول متاثر نہ ہو۔
